某程度上，基斯坦奴朗拿度（C朗拿度）係個令人既愛且恨嘅足球人物。佢今季踢得咁好，「粉絲」自然愈嚟愈多，但前日失驚無神無份踢對查爾頓場波，令無數喺網上遊戲FantasyPremierLeague撐佢嘅玩家大失預算。另外，有傳如果曼聯唔肯將佢周薪加到15萬鎊（約232萬港元），佢就決定離隊，如果消息係真，咁佢都算反骨。
「我唔見咗26分！」噚日我求大俠一返工，就聽到本報名家賴恩大吐苦水。C朗之前喺FantasyPremierLeague攞鬼咁多分，無數玩家搵佢做隊長（得分雙倍計算），佢今次喺無預兆情況下缺陣，試問受苦嘅又點止賴恩一個？當獲利回吐啦。
威脅紅魔要加薪5成
係人都知西甲雙雄巴塞隆拿同皇家馬德里都斟緊C朗，據英國《世界新聞報》講，曼聯本來決定將C朗人工加到10萬鎊，但C朗就一定要15萬。所謂人望高處，大家明嘅，但諗番C朗喺世界盃之後曾經係全英公敵，但曼聯繼續栽培佢，家陣佢威脅球會就點都講唔通。