原來香港波迷想睇欖球，唔一定要等到下個月嘅國際七人欖球賽，有時喺足球賽都可以睇到㗎。我講嘅係前晚西甲貝廸斯、西維爾互交白卷嗰場塞維利亞打吡，貝廸斯前鋒羅拔廸賓奴喺上半場主踢12碼射到3樓咁高，不知情者真係以為睇緊欖球比賽。西維爾大難不死唔代表可以開香檳，話晒佢哋接連失分，最開心應該係巴塞隆拿。