堪稱日本國民級格鬥遊戲的《VirtuaFighter》系列，本來令唔少玩家搖頭歎息，點知世嘉又爽快咁將佢移植落PS3，仲支援1080p全高清畫面，當然要搵班真正高手嚟砌番幾十場激戰，話畀大家知咩先叫FullHD打交！你拎到分數可買專用道具和配件，幫角色整色整水，而且打贏咗人之後，會有其他「人」搵你挑機。
文：神風
鳴謝：HIVIHK.COM（23616176）
地址：灣仔軒尼詩道300號中邦商業大廈7A室
原本世嘉最初只係公布《VF5》PS3版最多係對應720p，點知道臨發售先講佢去埋1080p呢個勁抽位，咁嘅條件下做測試當然唔可以求其啦。我哋於是搵間有番咁上下Size嘅AVRoom，配以輸出全高清嘅投射大銀幕，咁先充份體現到製作小組AM-2嘅超凡實力，話佢哋係唔輸畀日本No.1都絕對唔過份。好多人都可能覺得奇怪，點解堂堂日本街機名作，又唔係可以網上對戰，點解部機返唔到香港？你問我都答唔到你點解，總之好似話廠方唔想部機外流，所以死都唔賣出口，兼且佢會定時做OnlineCheck，因此俾你買到唔連線嘅Offline水貨都冇用。
冠絕同業最佳畫質
亦因香港無論點都同呢部街機絕緣，所以呢隻PS3版真係所有《VF》狂熱者夢寐以求嘅替代品，大家都深知家用版點都取代唔到落舖頭搵人挑戰嗰種味道，不過𠵱家有得玩已經叫做好好，而且移植水準亦令人非常滿意。無得直接作比較嘅情況下，佢令在場呢班鐵人拍手叫好，畫面完全保留番晒所有特效，夕陽光線和蠟燭已經小兒科，打得爛嘅地板與場景、踢走咗嘅雪地同埋個水池都做得勁正，真係頂級PCGame都未必做得咁細緻。而最令人印象深刻嘅係假如角色係着住絲質衫，浸咗水竟然係會有深色濕漉漉效果，呢樣嘢《DOA》同《鐵拳》根本就唔會有。雖然畫面嘅表現真係攞滿分，不過一定要彈佢讀碟唔夠快，即使裝落硬碟都要係咁Load，如果唔裝情況真係不敢想像。
模擬周圍踢館撩交打
唔計最基本嘅街機同對戰模式，《VF5》最過癮之處當然係Quest和Dojo呢兩個源自上集嘅玩法，先講Quest佢當正玩家置身日本咁款，當然嗰度係個虛擬城市，要好似真人去打機咁出卡開個角色，走訪唔同機舖搵人挑戰。由於所有人都係由十級起步，你自命武功高強可以搵啲八、九段嘅高手切磋，贏到就會加經驗值慢慢提升稱號，同埋拎到分數去商店購買專用道具和配件，幫自己個角色整色整水，想有型又得，想出位都得。好搞笑嘅係你打贏咗人之後，就會有其他「人」搵你挑機，唔想個Ranking跌番落嚟就要醒醒定定喇！至於Dojo即係道場，係俾你對住個假人使出指定招式，只要限定時間內入晒咁多招，就會獲得額外獎賞，搵呢個Mode嚟搞比賽其實都幾搞鬼㗎。
全場高手大讚好玩
為咗令今次試玩較有參考性，於是請來十幾個響香港《VF》界薄有名氣嘅高手到場，佢哋唔少人都有遠征日本挑戰鐵人嘅經驗，有啲仲俾當地雜誌訪問過㖭！大家不約而同都覺得，無錯隻Game畫面真係好高質素，不過如果肯俾玩家隨身攜帶資料搵人挑機，咁個踢館Feel就會好好多，𠵱家就只係同《VF4evo》差唔多，適合自己練功多啲。
時雨 《VF》經驗10年以上
「之前冇玩過呢集，驟眼睇畫面跟到至少九成，由於部街機嚟唔到香港，響屋企有得玩總好過冇。操咗佢一陣，都算係期待中世嘉應有嘅水準。」
旺角Sarah，《VF》經驗10年以上
「響日本玩過幾十鋪，畫面同操作都跟得番街機，試咗幾局發覺Combo至少跟到6、7成以上，仲有佢包含咗其他模式變得好抵玩。較唔好嘅係，唔裝落硬碟根本唔使玩。」
Calvin，《VF》經驗11年
「都冇去過日本試《VF5》，真係比較唔到PS3版有咩唔同，但佢畫面真係毫無挑剔可言，玩慣四代都好快上到手。有得響香港玩已經好好喇，不過讀碟時間真係幾長吓。」
阿聰，《VF》經驗約1年
「香港冇得玩街機版，因此響近乎冇比較嘅情況下，都算做到原版十成十水準，畫面同操作感覺唔到有咩分別。冇得網上對戰硬係爭啲嘢咁。」
首批激送懷舊版
數吓手指，對日本社會構成重大衝擊現象嘅《VF》系列，唔經唔覺已經誕生咗成14年，唔知幾多人當年響機舖操過成個積木人咁款嘅初代呢？廠方今次特別隨首批貨附送呢隻十周年復刻版，忠實Dub番成隻舊版出嚟配以《VF4evo》嘅所有角色，睇番啲積木人響度打嚟打去都幾有Feel。另外本系列出咗名對操作要求高，所以趁遊戲發售推出幾支新「的」，其中以較貴嘅RealArcadePro3同VirtuaStickHighgrade比較正，有佢幫手加埋個高清芒，街機感全部返晒嚟。
機種：PS3
廠商：Sega
類型：Fig
人數：1-2人
價格：$398
（連初回特典）
