退休賓架Bill哥請食午飯，席設紫玉蘭，此淮揚菜專門店年中無休，年初一二三照樣開門營業，方便中環食客。Ｂ哥每月例牌去幾次食飯開會，有佢喺度，自然食得安樂。
一班退休前輩言笑不禁，左丁山係後輩，得個聽字，例如前輩Ｔ講到塘西舊事，自己邊度會識吖，不過聽聽吓，忍唔住駁嘴：「Ｔ老兄，你未夠八十歲，塘西全盛時期，你頂多係小學生，點知道咁多嘢呀？」前輩Ｔ話：「唓，我老頭子係塘西常客，成日帶埋我去，佢與啲成年女士傾乜嘢，我唔知，我淨係喺度食啫。」Ｔ老兄系出名門，幼承庭訓，唔怪得佢對五六十年代嘅舞廳史瞭如指掌，佢話嗰陣時《華僑日報》有一個記者專寫「舞士道」，成日打電話搵佢攞料，探聽有甚麼紅舞女下海登場。
講起下海，前輩Ｒ有話講：「到六十年代初我仲有送大花牌捧紅舞女，大凡有靚女初登場，叫做『下海』，事先舞女大班就會搵熟客送花牌祝賀，以示有面，又會喺《真報》賣一段賀稿，好隆重㗎。所以我返大陸，聽見一啲高官、學者投身商場，名為『下海』，我就忍唔住笑。」
大陸靚女「下海」，不知係做生意吖還是「登場」呢？冇考究。地產Ｃ話：「使乜考究吖，大陸咁多靚女，唔憂冇前途，譬如初初改革開放時，國企改革，不少工人下崗（失業），靚女就唔使怕，有句順口溜：下崗美女不流淚，前面就是夜總會，誰說我們地位低，市長書記陪我睡。」估唔到地產Ｃ啲普通話發音，似足北方人，笑到我哋碌地。地產Ｃ又用普通話唱多兩款順口溜：「一等男人家外有家，二等男人家外有花，三等男人下班回家，四等男人妻不在家！一等美女飄洋過海，二等美女留守上海，三等美女深圳珠海，四等美女鄉下等待。」眾人轟然大笑，飲完紅酒，Ｂ哥請飲四川宜賓五糧液（即高粱、大米、玉米、小麥、糯米酒），含酒精39%，左丁山唔敢飲咯。Ｔ老兄整蠱左丁山：「用福建話講紅高粱，點樣講？」唔識！賓架Ｇ代講：「戇×両」，地產Ｃ連忙糾正：「唔好講粗口，紅高粱嘅福建話發音係似UncleLeung！」