港股前日成交急增至600幾億元，昨日又變番唔夠500億，個勢仲係橫行波動，如果成交唔上番去，大市唔會有乜大變。
滙控（005）發盈警，唔單止拖低港股，仲累埋街坊，花旗嗰邊嘅銀行股都因為呢個消息俾人掟，如果唔係油股趁油價升造好，前晚道指唔會跌咁少。
滙控盤數會點，𠵱家有好多揣測，以負面較多，冇辦法啦，早排啲頭頭因為股價冇表現，走出嚟同股民saysorry，原來已經係第一次「發盈警」，不過當時唔係咁多人收到，𠵱家又喺公布業績前幾個禮拜提前「自首」，會唔會真係好大煲呢？諗落都好牙煙，不過睇成交同技術走勢，短線沽壓已消除，股價暫時會喺139至142元上落。如果再插會點，250日線喺136.80元，到時就要睇吓呢條長期平均線嘅支持力。雖然滙控嘅影響力已經畀國企恒指股攤薄咗，但話晒都係「香港人的信心」（唔係「良心」），如果滙控跌穿250日線又爬唔番上去，咁就影響大咯，一方面係人心，另一方面係淡友幾乎可以肯定會以此大做文章，話唔定將滙控掟穿條250日線就係佢哋計劃嘅一部份。恒指𠵱家嘅形態仲好好，但係唔可以唔防範滙控繼續俾人掟所帶嚟嘅影響。
交行C輪3540：交行（3328）昨收8.79元，股價低沉咗個幾月，前日終於浮番上水面，升破20日線，技術指標好番晒，下禮拜應該唔會失禮。
交行C輪3540昨收1.05元，槓桿率8.4倍（有效5.1倍），對沖值0.629，正股第一個目標價9.80元，破位睇10.50元，升到呢兩個價，3540應該見到1.73元同2.28元，正股跌穿8.50元止蝕。