(1)送狗迎豬，下周日大年初一，FollowMe休息一期，在此先向股民朋友拜個早年。恭喜發財，恭祝各位豬年賺錢行情高漲，買乜升乜，叻過李兆基，醒過畢菲特。
所謂「飯後煙、年晚錢」，可見歲晚賺多個錢傍身好緊要。要搵年晚錢，甚至發埋新年財，今周有好介紹，出擊對象利記（637）。利字當頭，尤其係新正頭講意頭，大吉大利人人要，單係利記個「利」字已值得向各位推介，更何況值得睇好理由多多，分述如下：
前景靚爆鏡
一、同業一哥地立穩固，最啱基金胃口。利記與和記黃埔（013）前身和記洋行只一字之差，1947年已成立，今年踏入60周年（話唔定派送紅股以謝股東），為本港壓鑄合金採購及分銷公司，市場佔有率經常保持70%以上，穩居No.1地位。
二、業務前景靚爆鏡。利記經營鋅（符號Zn）與鋅合金貿易為主，並旁及其他金屬，其中鋅合金佔總銷量70至80%，亦佔中國入口鋅合金總量77%，可見獲大中華廠家重視程度。鋅居世界常見金屬第4位，重要性僅次於鐵、鋁與銅。供應商均係國際大字號如美國鋁業與加拿大Inco等。供求取得均衡，確保盈利滾滾來，一如豬籠入水。
PE勁低
三、PE勁低。利記屬半新股，去年10月上市，招股書披露06年度（12月年結）首5個月勁賺2.25億元，同比大增1.32倍，超出05年度全年盈利2.03億元達11%。只要餘下7個月盈利保持平均每月4500萬元，全年盈利達5.4億元，勁增166%。以加權股數6.58億股計，每股盈利0.82元，現價PE僅3.5倍，簡直平到笑，正到痹。
四、落後。利記招股價2.67元，最高3.24元，只升21%，現價僅升6.4%。
五、上市後有下文。利記唔會固守於金屬貿易業務，最近態度開始積極進取，收購多間內地金屬開採與冶煉公司，進軍上游業務。大股東兼主席陳伯中私人擁有不銹鋼加工業務，已簽期權合約，利記可向陳氏購入有關資產，埋下獲大股東谷肥壯大伏線。
六、鋅價上升有利。倫敦金屬交易所鋅價近兩年累升2.5倍。利記乃老行尊，善於對沖交易，鋅價長期穩升，得益更大。
短期利記以6倍PE為目標，可見5元。
高彰坡