正所謂愛靚唔愛命，早前吳文忻（Natalie）到韓國執樣，由個鼻、下巴到嘴唇，統統都嚟個大改造；約佢同架愛驅CLK240出嚟影相，諗住架車點都會嚟個愛美麗大改造啩？點知佢話：「我唔鍾意改車，原裝味道至吸引我！」外表斯文，點知一開車簡直車神上身，攝記、小記同架Benz跑全程頭搖又尾擺！「我手車係偏辣，不過一樣好小心，放心啦！」
文：許一楓
攝影：陳盛臣
胎軨都唔改夠原味
陽光普照嘅下午，跟文忻約定喺赤柱等，見佢匆匆忙忙趕到，工作使然，小記第一時間打量文忻座駕CLK240，唔單止平實穩重全無改裝，連胎軨都用番原裝無換過！
望咗一輪先發覺隔籬原來有位特別嘉賓──小狗阿旺！阿旺一見我哋已想撲出來，正當文忻熱情招呼攝記坐車頭之際，突然間發現個位有灘「黃甘甘」水迹！「弊傢伙！阿旺見到陌生人，興奮到標尿！」急急腳抹亁座位，小記一支箭衝入後座，文忻請求攝記同小狗阿旺坐車頭，只見攝記老星左手抱狗，右手忙着扣安全帶，仲有餘暇好溫柔咁安撫阿旺，從未見過咁愛心爆棚！肯定係畀面靚女啦，唔通畀面狗狗咩？
童年已識偷位泊車
喺一條羊腸小徑度試車，雖然單線雙程，但就算對頭有車埋身，文忻依然踩盡油門，未驚過！遠處見到停車牌，亦無收油意識，再望望咪錶，眨吓眼已去到50km/h，Natalie依然面不改容，嘩！使唔使去到咁盡先？直至靠近個牌半個車位前，突然來個急煞！一段短路已充滿刺激，係咪下馬威嚟㗎？
「我好享受揸車！」從小到大，文忻已偏好刺激，對於車，仲自豪表示有天份，「3歲時坐住BB車學行時，已識得偷位泊車，相信唔係咁多細路識咋！」面前嘅文忻單手揸車信心十足個樣，着埋件皮褸，簡直係《極速傳說》嘅女版伊麵化身！
人惡過車
16歲已喺美國考到自動波牌，返港後自動變成棍波牌，不過對於揸棍波嘅路面經驗就完全係零，竟然唔識死一支公揸住架棍波車四圍衝，「試過盲舂舂揸朋友架棍波車由屋企出發，點知未出停車場道閘，已經死咗十幾次火！」出到路面，更惹來後面幾架私家車嘅不滿，「佢哋嫌我慢兼不停死車撻車，喺後面猛砵，但我一於少理！」
以為文忻手車咁辣，一定鍾意波子、保時捷呢類嘅跑車，點知佢心目中只係鍾情Benz跑，「揸唔起法拉利、林寶同波子，就算有錢，都Handle唔到架車，如果揸到怯嘅話，倒不如唔揸好過！」係咪正如《極速傳說》入面嘅「人要惡過車」理論？
從小教育DrivingEducation
文忻苦口婆心咁奉勸大家，唔好心情差時揸快車，「試過喺美國同男友吵大鑊，喊到成塊臉都係眼淚，咩都睇唔到，仲要轟Hi-Fi，轉頭就炒上行人路，好彩人無事，只係爆晒胎！」自此，文忻唔開心同飲咗酒必定唔揸車，寧願坐的士！
揸車時，文忻話甚少出現危險鏡頭，「好多人話揸車好易瞓着，我從來都唔會，可能意識到揸車係好危險嘅事，更加會集中精神。」文忻從小在美國接受教育，當地的學車教育相當全面，「佢哋會不停播交通意外後嗰啲核突相，睇到你入晒腦，驚為止，以後揸車自然醒醒定定！」
明星至愛CLK
Mercedes-Benz的CLK車系，擁有雙門硬頂Coupe跑車版的同時，原來亦有Carbiolet開篷版，現時仍在熱賣的一代在02年推出後，不但廣受車迷歡迎，也成為了名人明星們的座駕。車身線條設計流麗，單是活像C-Class的「荷包蛋」頭燈，看起來已別具吸引力。
Mercedes-BenzCLK240Avantgarde規格
引擎：2,597c.c.V6DOHC
馬力：125kW/5,500rpm
扭力：240Nm/4,500rpm
傳動：5前速自動波
當年新車價：$625,000
現時二手價：約$450,000起