最鍾意睇鬼片，由荷李活大製作、貞子式的日本靈異系列，以至Ｎ年前的半搞笑半驚嚇港式鬼片，通通有殺錯冇放過。有網友不但鍾意睇鬼片，仲鍾意上鬼網、睇靈異照片，不過佢聽人講，睇得多會時運低，因為靈界都鍾意睇呢啲嘢，變相吸引佢哋埋身陪你一齊睇。咁事實上又係咪咁呢？即刻請教吓玄學家方海閱，方師傅話喺屋企睇鬼片上鬼網，如果屋企有安土地，一般低等靈根本入唔到屋，比起喺戲院、戲棚睇安全好多；不過睇得呢啲靈異嘢多，唔多唔少都會有心理陰影，疑心生暗鬼；假如撞正本身運氣差、屋運又差，就算唔撞鬼都會增加負面能量，令運氣更差！所以，如果發覺自己嗰排頭頭碰着黑，都係睇吓笑片，幫自己叉叉電方為上策。
記者：小雲
網址：cyberx.fransoftlab.com/cgi-bin/topic.cgi?forum=2&topic=4310&start=0&show=0