仲有個幾星期就係農曆新年，不過嗰種節日氣氛已經濃到滲晒出嚟！可能今年經濟好，問灣仔揮春舖老闆邊款祝賀語最好賣，佢話往年好多人搵「人人有工開」，今年行情係「步步高陞」，搞到斷晒貨！難買揮春？不如買個真糕過年好過啦！傳統年糕、蘿蔔糕都係中堅，不過今年大家搵到錢，新興嘅金箔年糕就成為大富大貴新寵！
記者：朱崇德
攝影：陳偉強、陳盛臣
Model：Yuki、湯尼
金箔燕窩食出貴氣
位於中環ifc嘅國金軒，一向以貴氣黃金做主題，今個新年佢哋首度推出金箔年糕！金箔壽司就食得多，放落傳統的中國糕點上，送禮自用都顯得貴氣十足；價錢都唔算太貴，百零二百蚊就搞掂，用嚟送禮特別有派頭。
金箔燕窩桂花糕透出金光$288
金箔碎粒密密麻麻放在糕面，望落相當金碧輝煌。國金軒一向好出名有個桂花糕，趁住新年就變身成賀年糕點；坊間一般做法是以亁桂花，國金軒特以貴價的金桂花糖製作，入口味道清香、色澤「透」出陣陣金光，而且仲帶着濃重花香；不過筆者最愛係桂花朵朵清晰可見，色相誘人，加上糕面放上1.5両燕窩球，據知是以貴價燕盞所出，$288都算值回票價。
金箔瑤柱蘿蔔糕特別軟身$198
蘿蔔切粗條，配以完全爆香的蝦米、雲腿、臘腸及瑤柱絲；蘿蔔的清香碰上惹味的亁貨肉香，一個人食半個絕不為過！阿廚話個糕做得咁滑溜，主要是以「加飯粉」開糕，這是一種以煮熟的米飯，曬亁後磨製而成的粉，用嚟做蘿蔔糕味道最夾，而且入口特別軟腍，又能帶出蘿蔔香。
金箔椰汁年糕低糖健康$168
講到中國人過年最愛糕點，首位的仍是年糕！椰汁年糕面撒金箔，兩色一撞感覺極出，糕底以糯米粉、番薯及片糖（低糖）所製，入口唔太甜，而且凍食時煙韌得嚟又唔黐牙，相當特別。
國金軒 （23933933）
地址：中環國際金融中心商場3樓3101店
磚紅年糕 傳統工藝
磚紅色的年糕，始終都係中國人過年的最愛！深水埗有間好出名做糕的「士多」，40餘年兩代人整糕點，平日出的芝麻糕、紅豆糕、缽仔糕，日日賣到排晒人龍，過年前呢兩個幾星期會出年糕，做法是近年罕見的老派，香港其他地方好難搵到了！
古法年糕煙韌彈牙$75
話明古法！做法係好傳統嘅真米糕，老闆傅生話：「先以銅鑊將蔗糖白鑊煮溶（因以銅鑊煮，點煮都唔會燶），然後將糯米磨成米漿，再以布袋扭出水份；兩者預備好就可以搓成年糕，材料就係咁簡單！」特別處係整出嚟嘅糕會特別煙韌彈牙！而且放幾耐都唔會裂開及散開。
紅豆糕金黃好意頭$35
老饕至愛推介！以原粒紅豆煲成紅豆沙，再加入以白米磨成的粉末，做成金黃紅豆糕；往年新年前專做年糕，其他糕點會停晒！不過街坊話過年有「鴻運當頭」寓意，老闆惟有迎合顧客，新年都照出！
馬蹄糕透得發亮$38
一般馬蹄糕係黃黃白白，但呢個就「透」得發亮，只有用最靚嘅廣州泮塘馬蹄粉先有呢種色澤；十分彈牙爽口！彈到連落刀都有回彈力，入口有陣陣馬蹄清香，再加新鮮馬蹄肉做點綴，咁先係馬蹄糕！
坤記士多 （23600328）
地址：深水埗福華街115-117號北河商場地下10號舖（深水埗地鐵站B2出口）
齋糕點 西式做法
中國人傳統初一要食齋，不過好多過年糕點都有亁貨肉食，實在好難叫人守齋！帝都軒今年新出一款上素南瓜糕，以南瓜打茸嘅西式做法做成糕品，最啱初一守齋食；價錢𠵱家全部做特價，過咗2月15號（年廿八），會全部做番正價，大家留意。
上素南瓜糕鹹鹹哋
特價$85/原價$108
將南瓜打茸又切成粗條，配以甘笋汁落色整成南瓜糕；起初以為係甜糕，入口先知做成鹹味，感覺更自然唔膩，而且亦去盡南瓜的「青」味！
五香芋頭糕夠粉香口
特價$98/原價$128
唔好以為種種芋頭都可以做糕，要做得香口好味，就一定要用暹羅芋頭；先將芋頭切粗條、磨茸，加入爆香的蝦米、臘腸及五香粉，打成芋頭糕，入口粉嫩又香口。
帝都糕餅店 （26943886）
地址：沙田白鶴汀街8號帝都酒店3樓
賀年辣糕 好潤喉
年糕個個一嚿嚿，真係毫無美感可言，翠亨邨今年推出的賀年糕品除咗用真材實料，最特別係用生果、菜蔬砌成哈哈笑及花卉圖案，用嚟送禮自用都一樣咁開心。
「福壽無疆」薑蜜年糕$128
以老薑的辛辣暖胃，配以蜂蜜的清甜滋潤做成年糕；糕底是糯米年糕，口感厚重，夾雜粒粒粗切的薑粒、絲絲辛辣，同一般賀年糕點完全反其道而行；為咗食落潤喉啲，糕中還加入了海底椰，食後簡直喉頭生津。
「馬到功成」馬蹄糕$108
粗切馬蹄配馬蹄粉做成馬蹄糕，彈牙口感及爽口程度絕對中規中矩；喜歡的是甜度調校得好，唔會過龍，面放的哈哈笑圖案，是以龍珠果及麵條所做，全部可食用，送禮自用都咁開心。
翠亨邨 （23762882）
地址：尖沙嘴彌敦道132號美麗華商場地下
客家年糕 紅到發黑
睇好多年糕都係紅噹噹，惟獨呢個紅得發黑，唔識貨一定唔會買！其實時下好多年糕都以砂糖加色所做，如以傳統蔗糖＋糯米粉所製，先有呢種紅得發黑效果，而且越黑就代表蔗糖成份越靚；老闆兼烹飪專家黃?如話：「由於我哋唔會落防腐劑一類化學物，所以我哋會隔日返貨，以保每一嚿年糕都咁新鮮！」
潘太：「近3、4年都係買佢啲糕過年，最鍾意佢夠純味又有蔗糖香！最好味食法都係切片香煎。」
有食緣（25236565）
地址：中環皇后大道中31號陸海通大廈地庫18號