股仔鬥癲，但好質素兼勁抵買嘅，就越嚟越少，看通（1059）肯定係表表者。看通翻一番，先合情理。看通同阿媽冠軍（092）一樣，過去5年持續增長，06年度（6月止）純利3.3億銀，增長24%，照計07年度PE，一樣係低企3、4倍。又看通年度派息3.1仙，增幅達到48%，息率高達5.7厘，就當07年度每股派息，係咁意調高10%，息率已經喺6厘樓上。看通PE平通電信科技sector，息率又係全行之冠，咁吸引嘅股份，又喺邊處搵？
再講，看通來自祖國收入，接近9億銀，佔總收入64%，加埋集團發展祖國電子博彩業，有好強嘅「ChinaPlay」質地。暫時無PE睇嘅彩票股華彩（8161），由上年尾到家陣，股價已經翻一番，科技股四通（409）及方正（418），炒完再炒，看通同期升幅不過23%。看通現價翻一番見1字頭，PE都係7、8倍，都仲係好殘。
北海等爆升
北海（701）整咗支好靚仔嘅上升旗，等爆升。北海近幾年去蕪存菁後，開始拓展祖國殯儀業務，兼已經成形。參考外國殯儀股，全部P/B上到兩三倍，北海P/B得0.5倍，已經有得炒。又呢期殼股變身，炒到飛起，單係新數碼（276），可以兩日升近3倍。北海殘足5年，現水位街貨有限，一發力遲早升到嘭嘭聲。博北海升上旗形目標0.3元，仲未有耐到NAV0.4元水位。