香港喺1998年底起踏入通縮、一直到2004年7月先至完結，就係由嗰陣開始，過年又興番封10蚊雞利是；家陣經濟明顯好轉咗，究竟今年啲人「封利是」時，出手會否闊綽啲呢？
10蚊雞畀路人甲
《親子王國BabyKingdom》討論區嘅「家庭理財」區內，一眾會員已經喺度熱烈地傾緊，究竟金豬年要封幾多錢利是？仲會唔會有人封10蚊呢？所得嘅結論係，一般情况下都會封20蚊，10蚊係留畀啲唔係咁熟嘅人──咁如果你收親嘅利是都係10蚊嘅話，就可以證明你嘅人緣有幾好嘞。
CHEUKYAM話：「通常一年先見一次嘅人，我都會封$10；同事、朋友就$20；至愛親朋就$50；父母、奶奶就$1000。」
littlefatc9提醒大家，「都會帶定啲$10利是，有時撞到啲唔多熟嘅人就畀$10。」
sindysindy就話：「會（封$10）呀，例如去拜年時遇到對方又有人嚟拜年，新年流流都要畀㗎，咪畀10蚊雞囉。」