每次狗仔隊騷擾到Eason的家人，又或者問及他的家事，他很容易會情緒不穩，與傳媒發生磨擦，有時更躁狂起來，連他自己都無法令自己平靜下來，到底是不是需要找位精神科醫生作心理輔導呢？
「我有一個朋友係精神科醫生，咁我當然有問過佢，我係咪精神有問題，佢話我只係執着，情緒容易大起大落，但唔係有精神病，叫我唔使咁驚，佢叫我慢慢控制吓自己EQ，我已經好努力去做，如果心情唔好時，我會同公司講，盡量唔好安排我做嘢，咁樣可能避免再同傳媒有衝突。」
改惡習從戒遲開始
踏進07年，Eason指自己除了學習控制情緒外，還要改善遲到的陋習。
「其實由上年開始，我已經同自己講過，要改善遲到呢個壞習慣，但唔知點解，臨出門口時，我梗係好鬼漏氣。因為遲到問題，經理人公司都話過我好多次，我都知遲到累人係幾討厭，你都鬧過我啦！咁我都承認自己係抵鬧，所以今年我好決心戒遲，但我唔敢講可以一步登天，但我會盡量去改善。不過最近已經有好大進步，呢輪拍《阿妙的十年》，我真係好少遲到，連開早班我都冇乜遲！」
攝影：陳偉權