紫金礦業（2899）最近消息多籮籮，除咗話要十合一，發行A股外，更牽頭與內地銅陵有色同廈門建發，以15.2億港元收購倫敦上市嘅銅礦企業Monterrico。呢間公司最吸引嘅資產係喺秘魯嘅銅鉬（音目，銀白色的金屬元素，可與鋁、銅、鐵等製成合金）項目，話係世上少有可開發嘅原銅鉬喎，但去年上半年除稅前仲蝕220萬英鎊，紫金會承擔當中約6.5億元。自宣布買礦，紫金復牌首日股價即挫近3%，𠵱家倒升4.5%。《香港討論區》近六成持有紫金嘅網友投票，話呢次收購銅礦對公司股價有利，但如果個價見6蚊就會鬆人；24%就會再睇定啲，等佢公布業績先至諗放定唔放。Alonso1120就話：「我嚟緊都會揸住唔放㗎啦！由佢慢慢升囉！等啲金價再升高啲先算。」山田拓海滿有憧憬咁講：「今次紫氣西來，仲唔升、升、升！」
驚係蝕本貨陀衰家
但亦有網友唔係咁睇好，非洲皇帝好擔心咁話：「呢個礦仲喺開發階段，咁即係冇收益啦，對股價冇幫助，玩吓手會整跌埋個股價。」
Lam233就直言：「呢件嘢可能係蝕本貨，要投資大量嘅錢。」RKC778亦話：「買咗個礦令紫金現金流減少，預期今年銅價會繼續低位徘徊，我畀佢嘅評級只係『持有』。」
銅價由上年8600美元高位反覆下挫，至今跌近44%，但網友超超反而認為，「有危就有機，當銅價升，紫金就發囉！」Fag就覺得紫金呢次收購都係出於國家需要，並唔係為咗股東利益着想。
德銀上周三將紫金列為「買入」評級，指收購銅礦對紫金非常有利，使銅儲藏量急升1倍，至1370萬噸；目標價定喺6.2元，仲有16%嘅上升空間；上周二中銀國際更話佢會「跑贏大市」，目標價會見6.5元。