最近寫咗關於一位「私家訓練員」到大學訓練大學生，關於「演述及溝通技巧」（PresentationandCommunicationSkills）一事（二月三日），即刻收到好幾位讀者電郵，要求與呢位「私家訓練員」聯絡，希望得佢指點。
呢件事有啲難度。第一，呢位英國先生係「演述訓練專家」，平時佢啲時間俾幾家大型投資銀行卜晒，最近仲聽講佢可能為一間大行嘅亞太區分公司度身訂造訓練課程，要在東南亞飛來飛去，忙到一頭煙。投資銀行做大生意，啲關係經理（RelationshipManager）、副總裁、董事總經理等等去見客，爭取併購IPO等生意，多數要花唇舌講一輪自己嘅意念、方法、步驟、收費若干、自己嘅市場優勢、豐富經驗等等，希望客戶受落，大筆一揮，簽下聘書（mandate）。如果上陣陳詞嘅負責人，演述技巧平凡過平凡，點會爭到生意呀。是故投資銀行家無論甚麼MBA、CFA歐美印度香港人士，都要受訓，改善演述技巧。故此上述呢位專家，手頭柯打大把，做賓架生意，賺頭唔錯㗎。
第二，呢位專家之所以肯到大學指點學生，全因賓架Ｗ為咗母校學生出錢兼出牙力，安排咗近一年，先至成事，𠵱家又度緊年尾到大學開班之期，其他恐不能兼顧矣。
一位讀者嘅數口甚絕，認為左丁山紙上談兵，開出盤口話曾蔭權贏硬梁家傑，其實盤口有錯（二月一日本欄），提供絕佳「套戥」機會，大佬呀，請高抬貴手，你咁精靈，去搵澳門燊哥「套戥」好過，左丁山開吓玩笑啫，如果真係收盤口，警察即刻會上門拉人。
另一位自外國回來嘅讀者來電郵指出外國唐人街有好多留學生唔識講英文，希望啲留學生唔好咁「閉關自守」，一味睇香港雜誌、香港劇集。收電郵之日，啱啱見到《華爾街日報》講北京誓要在○八奧運前清除全市六千三百個用錯英文嘅路牌，例如「Itishereprohibitionagainsttostoptoputthebicycle,andthrowtolosetheresultcomplacent」，（此處禁止停放自行車，丟失後果自負）。此事由一位講英語似莎劇演員嘅英語教師負責。不過一啲外國人就認為北京搞好廁所清潔，比改正英語更為重要！