呢日有緣有故，走入中華電力亞皆老街總部借洗手間一用，洗手之時，見到洗手盆牆上釘咗一個小牌，牌上有十八個字，就係「到渠成，車馬龍，萍相逢，靜河飛，似流年，心如止」。心諗中電總務部搞邊科，乜咁鬼得閒喺廁所玩謎語。後來睇真啲，下面再有兩句：「節約用水，響應環保」，方才明白，中電管廁所之人，特登去買呢個「告示牌」返嚟，有一份幽默感，既然節約用水，唔怪得兩個洗手盆之中，有一個「暫停運作」，冇水嚟。
如果有讀者猜唔到，答案十分簡單，告示牌刻意慳番一個「水」字，本應係「水到渠成，車水馬龍，萍水相逢，水靜河飛，似水流年，心如止水。」但係中電有唔少外籍人士返工，點解告示牌冇英文翻譯呢？唔通外籍人士一定知道節約用水，唔使提醒？抑或用意如日本一啲旅遊點，有古物畀遊客參觀，零零舍舍有四個簡體中文字：請勿觸摸？新宿歌舞伎町街頭往往見到一啲按摩院/土耳其浴室外有簡體字中文：外國人請勿進內。啲歐洲美洲外國人到咗新宿，會唔會識睇簡體中文字呀？咪直行直入按摩囉！
中電總部位於亞皆老街六、七十年，相信係成條亞皆老街唯一「五十年不變」嘅建築物，早期係住宅，二十世紀五十年代因寫字樓大廈不足，老嘉道理將住宅改變成寫字樓，佢哋一家人就住在嘉多利山（嘉多利即嘉道理），返工特別方便。最近聽到消息話中電考慮重建總部為豪宅，唔知嗰啲「共同回憶」派會否有所行動呢？再講一次，左丁山會用「共同回憶」代替「集體回憶」，凡是甚麼「集體」，未必係好東西，如集體回憶集體農場、人民公社，會令心靈痛苦；共同回憶大學時期玩到癲、借西裝去五枝旗桿下見女仔，就會心花怒放，「共同回憶」與「集體回憶」完全不同意境，下筆為文不必人云亦云也。