陳奕迅（Eason）在剛過去的四台音樂頒獎禮算是大豐收，因為四台的最受歡迎或最優秀男歌星獎都是由他奪得，他在樂壇的地位已受到一定的肯定，特別令他興奮，當然是首奪無綫的《十大勁歌金曲頒獎禮》之最受歡迎男歌星獎，因之前一直盛傳該獎會由古巨基奪得，但最後卻落在他手上，這個結局，自然是有人快樂有人愁。
滿足來自歌迷買碟
「首先我想講，我唔會視任何歌手為假想敵，我只會同自己鬥，唔想有太多是非，我開心嘅時候，就係攞住支咪喺台上唱歌嘅時候，乜嘢都唔使諗，只係好專注去唱。攞獎對我嚟講係有鼓勵作用，但講到有滿足感，反而係有歌迷肯用真金白銀買自己嘅唱片，喺𠵱家唱片業咁不景氣嘅情況下，網上非法下載又咁容易，要歌迷肯使成百蚊買張唱片，你估咁易呀！
「𠵱家過晒啲頒獎禮，個人靜番落嚟，發覺自己今年可以喺四個台都攞晒男歌手獎，真係幾開心，特別係無綫嘅最受歡迎男歌星獎，呢個獎以前來來去去唔係四大天王輪流攞，就係克勤，今年我真係冇諗過會得到，雖然早幾年我推出《ShallWeTalk》呢張碟時，已經有人同我講：『你應該得到呢個獎。』好可惜，呢幾年都係攞唔到，但周圍就有好多人不斷話你應得嘅，真係煩死人，到今年終於得到啦！感覺可以鬆一口氣，起碼唔使再聽呢啲煩人嘅說話。」
對劉德華另眼相看
各大頒獎禮結束後，Eason對劉德華刮目相看，因為華仔的專業態度好值得每一位歌手去學習。
「以前華仔係唔唱live嘅，如果大家細心啲留意，你會發現佢以前一唱live就會手震，但今年我睇到佢已經甩咗呢個毛病啦！佢連耳塞都唔使戴，一樣唱得揮灑自如，企喺個台唱歌嗰陣又有信心，佢連呢個心魔都克服埋，我真係幾佩服佢！𠵱家香港樂壇，俾咁多外來嘅歌星進佔市場，其實幕前同幕後都有責任，如果大家認真去製作啲好歌出嚟，歌星又努力唱好啲歌，電台同電視台又大力支持，傳媒唔好只係寫負面嘢，咁個樂壇應該會有得救。」