在十數年前，想找一部價錢公道而又像哈利般的Chopper車，相信非HondaSteed莫屬，只因此車的確帶有很濃烈的Chopper味道，還有很多不同的配件做Backup，最重要係入場費唔高，幾萬蚊有交易。在這十年間，本田更將另一電單車車系Shadow大力催谷，令其車系在Chopper界變得舉足輕重，而改款後更像哈利的Shadow亦可算是名正言順地，代替了Steed已保持很久很久的皇者地位，一眾車主為求獨特，更將其改裝得樂不可支。
文：TigerL
攝影：譚盈傑
改車會友 交換心得
同屬地獄鬼車會成員的阿Sam，因工作關係，平日很少駕其愛駒外遊，但一到假日也不會放過時機相約車會朋友，炫耀其愛駒一番，「一班人一齊出車，當然會心雄啲，而途人嘅注意力又集中喺我身上，感覺真係幾型㗎！不過我哋一班人有時都會互相交換心得，睇到其他車可以咁改，都會將呢啲Idea作參考，再改喺自己嘅車上……」作為改車一族，阿Sam也承認會暗地裏跟其他成員比較一番，始終每一位車主也希望自己的電單車能成為眾人焦點，當你將心血、時間和金錢都放在愛駒上時，最大的回報絕對是別人羨慕眼光帶來的滿足感。
回力鏢車頭 至搶鏡
HondaShadow的普及，原因除車價大眾化，二手車價能保持在3、4萬間外，由哈利改出來的車款亦係受歡迎元素，一班Shadow車主如今日的阿Sam般，就喜歡大改一番，務求獨一無二。
「全架車除咗車架同引擎外，其他都經過改裝，淨係改裝費就已經係車價嘅2倍！」工作為櫥窗設計的阿Sam，其座駕也帶有很濃的Design味，「由開始改車到𠵱家，都用咗7至8個月時間，好多配件都喺美國訂返嚟，而喺香港訂嘅配件就係自己諗出嚟，花紋雖然冇乜特別意思，但整體感覺就力求統一配合，尤其滿意車頭嘅手把造型，由多層薄片重叠再切割成三角形，絕對只此一家！
「個手桶係喺外國訂嘅，為求一致所以叫師傅將腳踏改埋同一款色，睇落去就成Set咁，整體上會Match好多。」除了車頭改裝勝人一籌外，還有令小記眼前一亮的風鼓，「個風鼓係原裝哈利配件，開車時嗰兩片扇葉仲會轉㖭！」
二手車價：約30,000
改裝費：約$60,000
扭力充沛 略嫌馬力不足
論舒適度，呢款Shadow750也數一數二，始終屬巡航車種，坐姿一定比其他車種更優勝。但馬力方面因其重量達235kg，對長途旅程而言就有點力不從心，「Shadow750喺扭力方面做得好好，冇路難倒佢，但係馬力就差少少，短途如市區嘅燈位起步，問題不大，不過揸長途車就冇咁好力水。」
「其他方面我都好鍾意，揸咗幾年TouchWood講句無乜修理過，又或者可能係我少揸嘅關係。」其實阿Sam真的很愛護這架心血結晶，除了少駕車外遊，還需經常清潔來保持其外貌光鮮，「始終電鍍Parts多，所以每次出車前都要打理一下，莫講話落雨天一定唔出車，有時亦會睇心情，撞着心情唔多好，都費時抹車啦。」確實因心情欠佳影響之下，其座駕也會跟着主人一樣，少了份神采。
HondaShadow750規格表
引擎形式：四衝程水冷SOHC6汽閥 V型雙汽缸
油缸容量：14公升
總排氣量：745c.c.
最高馬力：44ps/5,500rpm
最大扭力：6.3kgm/4,500rpm
傳動系統：5前速軸傳動
燃油供應：VE5BD34mm化油器
懸掛系統：
（前）41mm套管油壓前叉
（後）雙筒油壓避震
制動系統：（前）296mm煞車碟配兩活塞卡鉗、（後）180mm機械鼓煞
體積：2,510×940×1,090mm
重量：235kg
查詢：燦基電單車行（27622777）
