冷門股中建電訊（138）近日股價有異動，不過升幅相比起近排啲二三線股，仲係差好遠，中建近3年只係喺1蚊水平上落，同港股近年升勢脫晒節。提起此股自然諗到中建年前出售海爾電器（1169）股權予德銀，大舉套現5.51億元，不過其後再無大動作，亦無將資金用於業務投資或者派特別息，而係投資喺香港豪宅作收租用途，部份資金則用作投放在與國企股掛鈎之高息存款，係偏向保守嘅投資。
中建主要業務為製造及銷售電訊及電子產品、配件及零部件；製造及銷售幼兒產品；及持有證券及物業。電訊產品主要係室內無線電話，多個著名品牌如通用及Alcatel等均為中建主要客戶；幼兒產品業務方面，公司主要生產多種傳統塑膠幼兒產品業務、幼兒玩具及其他配件，主要市場為美國，客戶為跨國幼兒產品分銷商，香港同類股有隆成（1225）。
PE低得誇張
近年公司正開發消費電子產品貿易業務，主要透過旗下中建科技（261）去做。
研究完公司業務範圍後，再睇睇業績，公司04及05年度營業額約有40億銀，而公司市值只係8.8億銀，生意額係市值4.5倍，去年度純利2.25億銀，PE為3.9倍，06年度加入出售海爾特殊項目，PE低得誇張。
一間公司照計數價值驚人，但股價長期偏低，唯一解釋係大股東或管理層作風令投資者卻步，又或者街外貨源流通量不足，大股東亦無意炒高股價。事實上，中建旗下中建科技亦係PE低至3倍，盈利能力非常穩定，股價卻長期原地踏步。去年2月中建擬私有化中建科技結果失敗，係咪解釋得到，點解有人唔想隻股票升，反而想佢跌嘅理由呢？