去年11月產子後仍未收身的袁詠儀（靚靚），前晚在《門徒》首映禮上雙下巴暴現，又表現得論論盡盡，劉德華也忍不住取笑她。原來靚靚為火速收身，早前頻頻做高溫瑜伽，結果導致面部微絲血管爆裂，靚靚今次的經歷，正好告訴大家切勿急功近利！難怪靚靚前晚要向身形甚弗的華仔請教瘦身秘笈。
劉德華、古天樂、吳彥祖和袁詠儀主演的《門徒》，前晚在時代廣場舉行首映禮，大會為配合片中的毒品主題，以假罌粟花作現場布置，又安排點火儀式以及拋火棒表演，場面猶如嘉年華會一樣。
雙下巴盡現
靚靚去年11月產子後，至今仍未收身，面圓圓的她還露出雙下巴，前晚活動上靚靚更顯得十分「論盡」，先是穿上四吋高踭鞋上台時被貼紙黏着鞋踭，要勞煩華仔為她撕掉貼紙，繼而一班演員第二次上台時，靚靚忽然拿着手袋，原來她以為活動完畢而拿起手袋準備鬆人，連華仔也看不過眼，當眾扮鬼臉取笑靚靚肥胖。
事後問靚靚被華仔取笑肥胖一事時，她說：「我見華仔塊面好瘦，咪向佢請教極速修身要訣囉。我好想瘦塊面，之前去黃佩霞度做高溫瑜伽，因為自己太心急，結果微絲血管爆晒，塊面搞到紅卜卜。」
活動上，靚靚風騷地向記者及華仔等人大騷其子可愛的照片，她表示由於兒子患上感冒，故要急着回家湊BB。問靚靚可考慮拍修身廣告，她反應極大說：「唔好啩，當年選港姐嗰陣十幾歲，𠵱家做咗人老婆、老母，唔顧老公都要顧吓個仔，將來返學點算？我做唔到人哋好女友好老婆，都要做個好阿媽㗎。」
樂意做偶像
此外，華仔最近憑《墨攻》入圍亞洲電影大獎「最佳男主角」，對此他說：「冇乜所謂，呢套戲促進地方交流已經達到目的，呢套戲講兼愛非攻，本住呢個精神就唔應該入圍，所以香港電影金像獎入唔到圍都好開心。」
導演爾冬陞表示希望《門徒》每位演員將來也有份提名攞獎，但華仔卻說：「提唔提名唔緊要，最緊要畀演員多啲機會發揮同新題材去試，我樂意做偶像，亦樂意放低包袱。」
採訪：何永寧
攝影：仇志德
