農曆新年將至，今年各大賀歲西片會出動恐龍、巨熊等史前或現代生物湊熱鬧，但論最應節，似乎冇一部比得上《莎樂的神奇網網》（Charlotte'sWeb），呢套片雖然係「豬仔版苦海孤雛」，但入面可愛嘅豬仔韋寶絕對可以送畀大家一個又開心又溫暖嘅豬年。 撰文：戶川淳
今個星期四年廿八（15日）正式喺本地上映嘅《莎樂的神奇網網》，係改編自普立茲獎得獎人E.B.韋特（E.B.White）膾炙人口嘅兒童文學，原著1952年出版至今全球銷量達4,500萬本，更被繙譯成為23種語言，故事細膩感人，發人深省，早已被稱為豬仔版苦海孤雛。
孻仔冇奶食
豬仔主角韋寶出世嗰陣都幾苦，佢排行第11，但豬媽媽只有10個乳房，唔夠食，體形細小嘅韋寶就慘遭遺棄。不過，套片嘅主旨講求生，佢自己喺生命旅程中當然遇上唔少樂於幫佢嘅貴人，好似由狄高達芬寧（DakotaFanning）扮演嘅小女孩芬兒因為唔忍心拋棄韋寶，決意悉心飼養佢，不惜帶佢一齊返學，甚至替韋寶報名參加禽畜大賽，同父母師長力撐到底，過程中芬兒更發展咗一段好可愛嘅PuppyLove！
47隻豬替身
韋寶仲偶然喺穀倉認識咗由茱莉亞羅拔絲（JuliaRoberts）聲演嘅蜘蛛莎樂，為咗令韋寶逃離被劏嘅厄運，莎樂用八隻手為老友織出生命奇迹。相信大家睇呢套片嘅時候，都可以感受到友誼同關愛嘅重要，仲有平凡都可以了不起嘅正面訊息㖭。
講到製作，有兩套同係以真實豬仔加電腦特技嘅《寶貝小豬嘜》（Babe）做前科，《莎樂的神奇網網》今次製作更加認真，套片出動五間電腦特技公司製作，單係豬隻主角韋寶，其實係由47隻外表同身形一模一樣嘅豬仔演出，佢哋都係經過嚴格嘅訓練，一啲都唔可以睇少。