廖碧兒早前虛脫入院，前晚性感回歸睇騷，即時招惹專吼TVB女星的富家子丁子高獻殷勤，貼面咬耳仔又護送離場，不過廖碧兒好像只當對方一般朋友。同場被傳與蔡一傑搞同性戀的張耀揚，前晚刻意扮媾女，但又堅拒澄清性取向。學王勵勤父母話齋，娛樂圈男女關係真係亂七八糟！
廖碧兒近日被人氣急升的陳法拉爭去不少風頭，更有傳後者公然向廖碧兒男友陳豪放電。前晚在中環舉行的Fendi時裝騷，虛脫後性感亮相的廖碧兒仍然聲沙沙，她直認早前如報道所說，曾虛脫入院，她說：「係呀，我仲食緊中藥調理，之前我入咗醫院幾次，因為排舞錄音又拍劇，太辛苦。」
「係甜蜜的吻」
問她陳豪豈非很擔心？她笑着說：「個個朋友都好擔心，好彩冇傳染佢，因為拍劇時拍接吻戲。」法式濕吻？她甜笑說：「唔係，係sweetkiss（甜蜜的吻）！」
性感廖碧兒更吸引了曾經與女藝人如佘詩曼、李彩華、傅明憲等傳緋聞的富家子丁子高。他前晚以公關身份打正旗號招待一眾女嘉賓，但對廖碧兒特別體貼，全晚在場內陪伴對方解悶，又貼實廖碧兒面親暱咬耳仔，最後還護送廖碧兒出門口，但廖碧兒只當一般朋友應酬他。
回應同性戀聞
此外，早前被指與蔡一傑傳出同性戀的張耀揚，前晚終露面解畫，他對記者提問一一回答，在場內更刻意擺出𠝹女格局，多次與不同女伴談笑風生。
張耀揚說：「我咁大個人第一次上封面，我同傑仔識咗20幾年，之前係有一齊做GYM，但已經至少3年前嘅事。」雜誌指他倆家中短敍，張耀揚說：「朋友上屋企一啲都唔奇啦。」記者直接問他性取向及是否同性戀，他堅決不肯澄清自己的性取向，他說：「做乜要澄清？唔使啦，清者自清，如果我澄清話：『我唔係同性戀』，好似歧視人哋咁。」
採訪：娛樂突發組、顏英儀
攝影：林德雄
