出年就係美國大選年，選民最熱門嘅話題離唔開經濟，據《華爾街日報》嘅調查發現，有53%網民支持現任總統布殊嘅經濟政策，投反對票嘅只有35%，照咁睇，布殊所屬嘅共和黨有機會冧莊。但有網民警告，布殊嘅政策已為未來經濟埋下禍根。
cihlavf喺該報網站話，美國過去幾年喺布殊領導下，成功擺脫01年嘅經濟衰退，而且持續增長，令公司賺到盤滿缽滿；通脹受控兼就業市道改善，仲愈嚟愈多人買樓，總之經濟相當好。
mikesan就認為，布殊嘅經濟政策好壞參半，「投資者、有錢人同企業（主要係經營國防用品、能源、醫藥嘅公司）係得益者，但一般打工仔嘅財政狀況似乎差咗，當中好多人甚至冇足夠嘅醫療保健福利。」
FredIverson仲批評布殊上任以嚟，美國愈嚟愈多打工仔生活喺貧窮線之下；雖然美股連升幾年，但普羅大眾嘅得益唔多。
減稅→財赤→通脹→衰退
davidzislin話：「布殊為刺激短期經濟，不惜減稅，但咁樣係不利長期經濟，因為減稅令財政赤字激增，加上美國勞動人口減少，佢哋將要肩負滅赤嘅重擔。仲有，美國經常賬赤字好高，加上公司同人民負債沉重，睇怕當地經濟已經有隱憂。」
laurenfoster講，美國現時嘅國債係歷來最多，個人儲蓄率則降到76年來最低，呢啲問題只會令美元大跌、通脹加劇，仲會引致經濟衰退。不過到時布殊已經卸任，真係睬你都儍！
FederatedInvestors首席股市策略師奧蘭多都話，環球股市最大嘅隱憂，係美國經濟陷入衰退。