相信要數圈中專一的男藝人，呂方肯定榜上有名。他與女友鄭裕玲（嘟嘟）拍拖15年，雖然坦言現階段沒考慮與對方拉埋天窗，但他早已視嘟嘟為終身伴侶，更笑言希望所有傳媒好好祝福他們。
呂方自與鄭裕玲拍拖以來，外間多以「女方事業較男方好」來界定二人之間的距離，更有雜誌指呂方因「爛賭」當場遭女友責罵，對於種種報道，呂方無奈中仍難免帶點激動。
抗拒負面新聞
呂方說：「以大家認識嘅嘟嘟係一個咁有學識咁有教養嘅人，佢會唔會大庭廣眾鬧我呀？我知外邊好多人覺得我事業唔多好，有啲甚至話我使女人錢。講真我一直有接騷登台，呢啲工作我又唔使call記者採訪，如果我做呢行咁多年一啲積蓄都冇，就一早死得啦。」
從以上的回應，看得出呂方十分介意外界對他的評價，不過他強調這些報道沒有影響到他與嘟嘟的感情，因為一段維繫了15年的感情得來不易，所以他一定會好好珍惜。呂方說：「我希望雙方都會珍惜呢段感情，至於結唔結婚都順其自然啦，總之我想所有人都祝福我哋，而唔係寫衰我哋囉。」
下月舉行個唱
闊別紅館18年的呂方，將於下月舉行個唱，對於現時樂壇新人湧現，他坦言沒太大感覺，但表示若自己是唱片公司老闆的話，一定不會貿然為新人出唱片，他說：「出唱片唔係話識唱歌就出得，𠵱家好多新人就係冇經歷冇鍛煉，唱片公司見到呢個好樣就話幫佢出唱片，根本就係逐個逐個試，睇吓試到邊個得邊個可以紅，畀我做老闆的話，我一定要訓練佢5至6年，唱得跳得先畀佢出唱片。」
採訪：李珮洳 攝影：陳志嵐
場地提供：KingLudwigBeerhall
