電影《光豬6壯士》故事背景城市喺英國嘅設菲爾德市，當中球會錫菲聯今周聯賽迎戰熱刺，兩軍實力係有明顯距離，主隊真係隨時被人「剝光豬」都似，「讓球」平手早捧客軍無妨。冷選可乘勢追打「落水狗」里昂，博其繼續不勝吼對家。華度
嚟到𠵱家季中階段，今季新升班嘅錫菲聯，仍然排喺聯賽榜下游位置，可想而知，佢哋目前同其他超聯球隊嘅實力，仲有啲距離；迄今進行過26場聯賽，成績總計為7勝6和13負，輸同唔輸，各佔半數。最難令人睇好嘅係，領隊禾諾克對於揣摩球隊最佳陣容方面，似乎仲係有啲心大心細，除咗前場及門將兩環，中場及後防線一直出現人腳變動情況；尤其係邊路位置，鋒線縱有侯斯及史廸兩位頂得下嘅典型英式前鋒，欠缺兩邊側擊供應，都係嘥料。
料作客更小心做好防務
熱刺方面，整體球員質素尚算有保證，起碼有大部份成員都係國腳級人馬；前線鋒將個個當打，中場殺着亦有艾朗連儂呢條「濕手巾」，惟獨防線，隊長京治傷咗，可靠人物基本上得番戴臣，雙腳難敵四腿，搞到國腳門將羅賓遜，最近就頻頻喺龍門入面執波出來，放喺中圈重新開波。
雖然熱刺近期走勢麻麻，防線亦因人腳不整而欠穩，但錫菲聯今季重未試過喺一場比賽入面，入到超過兩球，相信以熱刺質素，勉強都頂得住；加上熱刺作客，可期更小心防務，憑貝碧托夫、羅比堅尼及艾朗連儂打反擊，都唔係冇計開W。「讓球」就最抵玩，平手盤，熱刺博得過。
追打「落水狗」里昂
冷選方面，法甲班霸里昂踏入07年行緊霉運，聯賽4戰只得1和3負，上輪作客弱旅特魯瓦，都要喺完場前被對手入波輸0:1。今輪里昂雖返主場，對手亦只係羅連安特，唔理咁多，一於追路再博里昂不勝，「讓球主客和」羅連安特「客勝」有啲肉食。
投資特攻隊金句
「錫菲聯今季仲未試過喺一場比賽入面，入到超過兩球，相信以熱刺質素，勉強都頂得住。」