韋根已經今時唔同往日，傷嘅傷，走嘅走，韋根缺少前鋒嘅情況下，想贏阿仙奴，只可以寄望奇迹出現！
從上年開始睇到韋根傳統嘅4-4-2打法，一對自己可以搵食嘅前鋒亨利卡馬拉同羅拔斯，靠穩守突擊，已可殺對手措手不及。可惜，今年唔同晒，羅拔斯走咗，前面得番亨利卡馬拉，幾好波都冇用，雖然有希斯基、麥高洛治，以及新買番嚟嘅尼日利亞國家隊首席射手阿加賀華幫手，前面真係好似好多人；不過，我認為韋根嘅前鋒組合都係亨利卡馬拉、羅拔斯最夾！
自從亨利卡馬拉喺12月中傷咗之後，韋根錄得「8連負佳績」！韋根會方證實，呢位塞內加爾好波之人已經傷癒，聽晚好有機會上陣，我諗阿仙奴好難大炒對手，有機會開「讓球主客和」「和局」！
至於西甲賽事，雖然皇蘇實力大不如前，但皇馬呢期內憂一籮籮，上場仲主場輸波，加上歷來皇蘇主場對皇馬都打高幾皮波！我今晚冷冷地博和波都唔係好過份！
周鵬
商業1台《球迷集中贏》主持
電郵：[email protected]