陳自瑤（YoYo）喺電視劇《突圍行動》中飾演刁蠻少女，同扮二世祖嘅蔡淇俊做一對，雖然佢哋喺拍劇期間曾經傳出緋聞，但現實中嘅YoYo，感情狀況十分迷離，事關佢黐女唔黐男，前年佢同中性打扮嘅女記者被拍得喺維園摸黑親熱，就更加令人懷疑佢嘅性取向。
齋睇電話
早前YoYo同一名長髮女性朋友，晚黑8點零鐘喺銅鑼灣出現，當時佢戴墨鏡，同女伴親暱蹺手行去怡和街嘅數碼通專門店，當時佢哋一齊企喺櫥窗睇Nokia電話，但齋睇冇買，跟住蹺手去附近嘅大眾同Orange專門店再睇過，不過始終睇唔啱心水，於是女伴就蹺番YoYo嘅手，慢慢行去渣甸坊方向。
「蹺手平常」
由於當時成街都係人，所以YoYo同長髮女伴行緊路時，為避開迎面嘅途人，改為手拖手行咗一陣，但冇耐佢哋又蹺番手，好親熱咁行去小販檔揀平貨，YoYo全程懶理途人眼望望，繼續同長髮女伴耳語，仲肩並肩黐到實。本來噚日馮仁昭都想問佢會唔會擔心再招話柄，可惜YoYo冇聽電話，唔知佢忙緊乜呢？
YoYo噚晚透過電話回應話：「其實女仔同女仔蹺手好平常，冇乜嘢啫，如果咁都覺得有嘢就好奇怪囉，同個男仔就奇怪。」問佢係咪百分百鍾意男人？YoYo反應好大咁話：「咁梗係啦。」
