歐陽震華（Bobby）同蒙嘉慧（YoYo）前晚喺尖沙嘴拍攝無綫劇集《爸爸閉翳》，劇情講佢兩個喺街上漫步，經過架的士時，咁啱個的士司機喺度淋車，啲水差啲淋到YoYo，Bobby就即時為對方擋駕，自己就成身濕晒。Bobby成晚總共俾人淋咗6桶水，途人見到佢一副落湯雞樣都忍唔住笑。不過YoYo都走唔甩，喺第二take時，啲水彈得太猛，搞到YoYo都濕身。
着濕鞋扁嘴
YoYo同Bobby合作過好多次，所以佢哋不時整蠱對方。前幾日YoYo喺屯門為呢套劇拍一場落水戲，當時Bobby仲猛叫YoYo喺水浸耐啲，當日天氣又凍，激到YoYo紮紮跳。所以前晚YoYo知道Bobby要被淋水，就猛話加啲冰入桶水度，不過因為買唔到冰，最後奸計唔得逞。
YoYo話：「之前嗰場落水戲，連對鞋都浸到濕晒，但今晚對鞋都未亁，因為要連戲，所以一陣都要着番對鞋。」現場見YoYo着番對濕鞋時，忍唔住扁晒嘴。
