股票嘅魔力無遠弗屆，連讀緊書嘅學生哥都有興趣玩埋一份，17歲中五生Icqicq88話自從睇過馬克思主義後，學到腳踏實地，知道打死一世工冇發達，一定要錢搵錢。佢嘅興趣係畫畫，想學吓投資，搵多啲錢將來搞間動畫工作室，但礙於自己讀文科，數學根柢又差，對投資一無所知，唔知點入手，於是喺《Uwants討論區》留言，問吓網友投資股票嘅意見。
網友Sirpoon好唔客氣咁教訓佢：「17歲學人買股票，不如專心讀書好過啦！想一朝發達，輸死你呀！」Chukailong就勸佢：「股票唔係你哋啲小朋友玩嘅，第一，你無錢；第二，未夠18歲，唔畀開股票戶口；第三，俾阿爸阿媽知道實打到飛起；第四，當你想買嗰時，熊巿都差唔多嚟到，唔使旨意入貨。」
而自稱鍾欣桐嘅網友更提醒佢，「買股票唔係實賺，玩吓手會搞到家破人亡；想發達，就要畀心機讀書，呢個世界好現實，𠵱家冇張大學文憑，我擔保你呢世都無運行。」Kevinkwan1228就覺得買股票唔係壞事，但如果一開始就以賭博嘅心態去學，即係心術不正，亂咁投機，好容易惹禍上身。
先做定期等成年
雖然Icqicq88嘅留言惹來不少訓斥，但亦引起部份網友共鳴，Jere99就話自己都係喺差唔多咁嘅年紀，已經開始留意股票，但就無買過，「嗰時只係做吓啲模擬買賣，睇吓有無得賺，考吓眼光；你都可以學吓，到真係掂嘅話，先至買小小試吓。」
Chrisggg更話：「用利是錢嚟買吓銀行股都唔錯嘅，最緊要唔好掂窩輪住。」1357531見𠵱家個市風高浪急，就提議，「不如將啲錢做一年定期，過咗18歲先再考慮投資。」