上個星期在立春前突然轉冷，雙手凍冰冰，一支暖笠笠玻璃樽裝維他奶在手，好過戴一對手襪。喝一口熱辣辣的維他奶，彷彿聽見溫拿和蕭芳芳一起說：「點止汽水咁簡單……」一個品牌能深入民心，可能只源於一句口號。
記者：梁學文
攝影：黃子偉、梁學文
Model：Jeffery
Wardrobe：Diadora
維他奶 記得明星
一講起維他奶的宣傳口號，無論是4字頭或是1字頭，總會有一種回家的?暖感覺。要數經典，不能不提70年代的「點止汽水咁簡單」，溫拿跟蕭芳芳讀出的這句口號，代表着70年代香港經濟開始起飛，消費模式開始轉變，人人追求方便。問40多個街坊，哪個維他奶廣告最經典，差不多有30人都會記得是芳芳姐的「點止汽水咁簡單」，個個都話當時維他奶是一件潮物，尤其是在芳芳姐同溫拿五虎的口中說出，更加深刻。另外，陳浩民和陳曉東在維他奶廣告都佔了重要地位，尤其是陳浩民演出的鄉情，以朱自清的《背影》做骨幹，為維他奶加深了溫暖的形象。
維他朱古力奶 啱味啱晒你
「如果太多牛奶味，朱古力味無碇企。如果太多朱古力味，牛奶味又唔爭氣。維他朱古力奶有牛奶味，又有朱古力味，啱味啱晒你。」事隔超過20年，幾乎個個3字頭都識哼。牛仔和豬仔於廣告入面跳Over，記得這項運動忽然大熱，街上和遊樂場忽然變晒小朋友的體操場。
八珍甜醋 30幾年份外香
「恭喜你、恭喜你，添丁又發財；紅雞蛋、豬腳薑，八珍甜醋份外香。」短短的幾句恭賀歌詞，簡單又易記，沿用了30幾年，就算前幾年甜醋換包裝，廣告歌依然不改，「30幾年前我哋用呢隻歌，希望可以恭喜香港人生仔，亦希望宣傳到八珍。嗰陣我哋搵方伊琪唱，都好貴吓喇！一句八珍甜醋份外香，肯定係Legend，好似上次換包裝，我哋都保留住隻Jingle，希望可以留住過往一份回憶。」八珍甜醋董事經理伍錦康說。的確一句簡單的歌詞，一直家傳戶曉至今，好多時食豬腳醋或者朋友生BB派薑醋，甜醋放入口，心裏都會自然哼起「八珍甜醋份外香」。伍生邊哼邊講：「最開心係有一次去門市，見到有個大肚媽咪拖住個小朋友嚟買甜醋，一路買一路教個小朋友哼隻歌，仲話畀個小朋友聽佢細個出世嗰陣佢婆婆都係來呢度買甜醋。一聽佢講完再哼隻歌，個心即刻甜晒，原來我哋真係可以陪到香港人成長，仲一代傳一代。」
李錦記 蠔油餐餐陪住你
講到廣告歌，又怎可以少得葉麗儀唱的《李錦記餐餐陪住你》？雖然現在李錦記不再用這隻Jingle，不過一哼起「日日食盡珍饈與百味」，自自然然就會有人接下去。這個80年出品的廣告，難得可以搵到葉麗儀唱，因為能夠請得到葉麗儀級數的歌星唱歌除了銀彈之外，還要品牌夠地位。
綠寶 喺酒店叫嚟飲
以前去維記踢完波，總會去士多買支綠寶橙汁歎吓。由玻璃樽裝飲到紙包裝，味道依舊。現在綠寶的聲勢大不如前，不是很多地方可以買得到。要緬懷舊廣告，只可以上YouTube回憶。講到經典，當然是小朋友去半島酒店叫支綠寶個廣告，小時候睇到個廣告，每次去餐廳都好恨可以學一次，可惜到了有能力自己上餐廳的時候，經已不再是細路哥了！
維記 香啲濃啲滑啲
除牛奶公司外，飲牛奶都會選維記。有60年歷史的維記牛奶，最為人熟悉的口號當然是「香啲、濃啲、滑啲！」味道方面的確跟牛奶公司的有分別。難怪在99年至04年間，能夠成為連續6年的銷售冠軍。
公仔麵係好朋友
以前零用錢不多，不像其他富貴人家可以食「日本嘢」－出前一丁，能用兩蚊買一包公仔麵已經很開心。就算現在買得起出前一丁，公仔麵始終是首選。
公仔麵一向建立了個好朋友形象，總比日本外國貨來得親切。其中最令人印象深刻的，肯定是Barbie篇的廣告，兩個鬼妹仔打扮成Barbie模樣，形象非常突出。
紅燈牌 4磅裝食油探親必備
紅燈牌最為人熟悉的是於78年登過一則糧油廣告，阿媽一代肯定會記得。78年中國糧油比較短缺，市民回國探親例必買些回去，當年海關規定每人只可以帶4磅裝，結果紅燈就推出4磅裝，並推出報紙廣告，一來提醒了很多要回國探親的香港人，二來又可以宣傳到紅燈牌。高級商品經理袁順貞說：「當年我哋推出4磅裝，跟住賣報紙廣告，𠵱家好多70年代人都記得。最記得係海關嘅規定，𠵱家講起都仲好記得㗎！」
牛奶公司 喺邊度嚟㗎？
雖然已經改咗名，不過去買牛奶公司牛奶的習慣依舊不變，好記得廣告嗰句「牛奶喺邊度嚟㗎媽咪？Dairy，Dairy。」因為小時候曾經問過媽媽話牛奶從哪裏來，當時媽媽當然不會答是Dairy牛奶公司。
經典場面
佢哋最記得邊個廣告？
訪問咗10個街坊，有7個都話最記得維他奶廣告，當年拍廣告的主角都成為明星，所以特別深刻！
李小姐：「我最記得係維他奶廣告，好幾個口號都記得，最記得係朱古力奶嘅歌。」
Jeffery：「八珍甜醋份外香吖嘛！」
張小姐：「八珍甜醋份外香肯定係經典。」
梁先生：「我都覺得八珍隻歌係家傳戶曉。」
Josa：「維他朱古力奶隻歌，我都有唱畀仔仔聽。」
Jeffery：「維他朱古力奶有牛奶味有朱古力味，我都識呀！」
