恒隆主席朗尼．陳啓宗講嘢一向風趣抵死，噚日佢公司公布中期業績，有記者問佢有冇入標競投將軍澳56區項目？佢講咗一大輪，話恒隆似隻龜，喜歡爬吓爬吓，雖然行得慢，但係長命好多。
員工平均加薪6%
簡單嚟講，華華估恒隆計唔掂數，唔知個項目點先賺到錢，所以寧願做少個，好過搞出大頭佛。如果第日要蝕錢，做隻兔仔跑得快又有鬼用咩。朗尼陳就係因為咁精明，令公司賺大錢，今年員工平均加薪6%，可喜可賀。
難得見到朗尼陳，華華梗係要問吓近期講到㷫烚烚嘅特首選戰。華華直接問佢，估曾蔭權可唔可以做好呢份工？朗尼陳拋低一句：「仲有第二個做到咩？」咁就已經知道朗尼陳支持邊個啦。下月25日特首選舉喺老遠嘅機場展覽館舉行，朗尼陳沒好氣地話，你身為選委要去投票，遠到沙頭角你都要去啦。