鍾嘉欣去年在《萬千星輝頒獎典禮2006》中，以大熱姿態奪得「飛躍進步女藝員」獎項，成為無綫07年力捧花旦之一，但嘉欣未因此感到自滿，計劃未來多花時間鑽研演技外，更準備拜陳潔靈師學唱歌，希望做到周身刀張張利。
鍾嘉欣04年挾華裔小姐冠軍之名加入娛樂圈，短短三年間，嘉欣演藝事業上已稍見成績，在去年無綫《萬千星輝頒獎典禮2006》中取得「飛躍進步女藝員」獎項，並成為無綫07年力捧花旦之一。
獲力捧未敢自滿
雖然攞獎後受無綫力捧，劇集及電影工作接踵而來，但嘉欣仍不敢因此自滿，日前她接受本報專訪時，坦言自己在許多方面仍需努力，如唱歌方面便是她來年努力大計之一。
鍾嘉欣說：「目前係有好多機會作唔同嘅嘗試，但似乎未能夠完全集中做到最好，好似唱歌咁，雖然我有機會唱劇集主題曲同片尾曲，但我希望每方面都可以畀到實力人哋睇，所以嚟緊會搵老師學唱歌，練好唱歌技巧，錄音師話介紹我跟陳潔靈學唱歌，但未知對方有冇時間教我。」
向一眾前輩偷師
說到演技方面，嘉欣透露有份演出重頭劇《珠光寶氣》，是好好的學習機會，她說：「喺呢部劇裏面，我飾演一個好放任嘅有錢女，角色已經同之前做嗰啲好唔同，加上今次係同林保怡、蔡少芬成班好戲之人合作，自然有機會偷師。」
採訪：戴彩煥 攝影：陳偉權
服裝提供：DKNY
