數碼通噚日卒之有新動作，同Vodafone合作推出亞太區第一部Vodafone3G手機710，靚女model同手機固然養眼，但都唔及數記CEO得格拉斯．黎大鈞嘅一貫「寸嘴」精采（圖中）！
由於業績將至乜都唔講得，得哥只可就住近排業內幾個hottopic發表意見：香港係咪要Wimax，佢話數記嘅HSDPA已經覆蓋成個香港，乜為之全面？即係計埋所有室內同地底，所以唔知要Wimax嚟做乜，如果啲人係要掟錢落海搞都冇計。
政府前日話香港技術落後番？得哥話一定唔係講數記，對家就唔知。發CDMA2000牌呢？令市場複雜咗，operator賺少咗！
咁8號仔重返流動電話市場有冇造成衝擊？得哥話，競爭一向激烈，但淨係睇到佢哋（指Sunday）轉咗owner……至於自己部新機710，1280蚊有回贈，淨機價係838蚊，唔係最平但係最抵嘅3G機，平（例如油魚超人啲零機價），係冇用喎……所以話，寸係唔使長氣㗎！
[email protected]