繼早前用六版廣告暗串8號仔後，「弱勢社群」香港寬頻老闆、電訊界另一「寸嘴」王維基，又搵到位𡁻對家！
老王噚日推出月費「僅」$238同$688嘅bb50、bb200寬頻上網服務，兼夾推埋好似銀行電話理財咁嘅「全為您」個人化客戶服務，咁夠膽越收越貴，佢話喺舊年中已經睇到啲客接受到貴嘅月費，因為大家𠵱家注重質素，所以好快唔會再有200蚊樓下嘅嘢。
總之唔會賣盤
咁寶島地震之後，有冇多咗客轉去佢度？老王話，有呢個情況，但唔係好勁，事關啲消費者幾唔鍾意嗰間公司都好，好多都因為簽咗約綁住未走得喎。都係個句，寸人，一句都寸死你！
講番老王，周不時俾人傳佢賣盤，上幾個星期仲刺激到股價都升埋，佢老哥話，可能因為個股價太低殘，未反映到公司價值，所以成日俾人話佢冇心戀棧囉，總之佢唔會賣，希望啲人唔好再亂傳。都係嘅，自己一手打番嚟嘅江山，理論上係冇乜理由要賣，你幾時聽過油魚超人話要賣盤呢？