「跟紅頂白」可能未必係最好嘅買波策略，但長買有近7成贏盤率嘅紅盤，維番皮計落都有着數。
曼聯同雷丁可話係今屆英超紅盤王，兩隊都有61.5%贏盤率。曼聯今季開26場亞洲盤，就贏足16場；或者球迷見到紅魔讓球半/兩球就縮，但睇番佢哋贏親好少話贏半格，炒起上嚟真係停唔到。今周曼聯主場對查爾頓，「主勝」同上盤應冇難度。
升班馬雷丁同紅魔並列英超紅盤王，近7場亞洲盤又係全贏，無論讓球或受讓都照樣殺晒。周六佢哋主場出戰阿士東維拉，客軍近6場亞洲盤玩單跳，上場先擊敗韋斯咸贏盤，依走勢應該回吐喇啩？
西甲紅盤王桑坦德自開季盤路3連敗，近18場亞洲盤14贏1走3輸。周日桑坦德作客巴塞隆拿，睇嚟盤口都要受讓球半；以巴塞冇咗「細哨」嘅威力，加上成半隊喺周中服國家隊兵役，讓得多分分鐘又要輸盤。建議用平均注碼買「和局」同「客勝」，一於自製桑坦德受讓一球都有錢落袋嘅下盤。文：畢傑
今周推介
讓球主客和：星期六1雷丁勝[-1]（4.1倍）、星期六14曼聯勝[-2]（2.2倍）
混合過關：星期六1雷丁勝（1.95倍）x
星期六14曼聯勝[-2]（2.2倍）x
星期日31巴塞隆拿和[-1]（3.5倍）3x4
*只計今季聯賽戰績及亞洲盤、半個盤當一個計