曾特首競選連任特首，發表政綱宣言，洋洋幾千字，捉刀人捉摸特首近年心水，宣言間中拋番幾句書包，又用吓一啲「三大好環境」、「十大關係」、「五大主題」等內地「數字用語」，等特首語言有啲內地feel。呢樣嘢，任總裁最早識得，活學活用，其他官員如果唔快啲學習，會變成落後分子。
溫總理談話，好少唔會講番一兩句詩嘅。曾特首好嘢呀，喺宣佈競選之日（二月一日），似漫不經意咁講：「不論官員還是議員，不論身在政府總部還是議事堂，廟堂之高，江湖之遠，對民間疾苦之思，憂患之情，都應該是一樣的。我們投身公務，都是為服務市民，凡事要向市民交代，所以應該將個人、黨派、界別的利益都放在市民利益之下。」
咦，廟堂之高，江湖之遠，出自范仲淹之《岳陽樓記》，「居廟堂之高，則憂其民，處江湖之遠，則憂其君。是進亦憂，退亦憂……」特首身居高位，唔似得范仲淹謫受巴陵郡咁慘情喎，是否引用得當，要古德明先至識講。
特首後來又講：「生年不滿百，長懷千歲憂」（據《大公報》版本）；「今夕復何夕，共此燈燭光」，中七生Y捧讀全文，睇到呢度，唔識噃，點知佢阿嫲雖然只有小學程度，立即背番七十年前讀過嘅詩句：「人生不相見，動如參與商，今夕復何夕，共此燈燭光，少壯能幾時，鬢髮各已蒼。訪舊半為鬼，驚呼熱中腸，焉知……」學生Y話：「夠嘞夠嘞，前日我哋去邊度食飯呀？」阿嫲話：「唔記得咯，係唔係……」學生Y惟有嘆服，因為佢真係唔識古詩也，但「我會做好呢份工」咁淺白嘅口號，學生Y當然非常明白啦。
「今夕復何夕」出自杜甫《贈衞八處士》，全詩悲多於喜。「生年不滿百，常懷千歲憂」出自古詩十九首之第十五首，主旨在叫人行樂及時，唔好掛三掛四。特首講「長懷」，應是「常懷」之誤，「生年不滿百，常懷千歲憂」，實與范仲淹《岳陽樓記》之「是進亦憂，退亦憂」嘅意思相反，因為下面四句：「晝短苦夜長，何不秉燭遊！為樂當及時，何能待來茲!?」特首文稿捉刀人，應該睇真啲。