鄧兆尊入行以嚟星運一直半紅不黑，雖然早前同阿媽祥嫂（洪金梅）解決咗10年恩怨，但星途都係冇乜起色。既然冇嘢做，惟有拍拖打發時間。馮仁昭日前就喺灣仔東方188商場撞到兆尊同一個女仔行街買嘢，嗰個女仔叫車厘子，英文名Cherry，本來係安德尊嘅助手，兩人關係曖昧，冇耐鄧兆尊加入，釀成爭女戰，當時傳出兆尊追求成功，車厘子移情別戀。
陪睇新碟
當日兆尊同車厘子行商場，當然唔似得谷德昭咁去掃鹹碟，而係行遊戲機舖同漫畫書店。佢哋先行入一間遊戲機舖，老闆見到兆尊即刻熱情招呼：「鄧生你好！」睇嚟佢係呢間舖嘅熟客，不過兆尊睇唔啱心水，轉攻附近其他店舖，目標都係鎖定喺遊戲機碟同漫畫書。行咗一陣，兆尊買咗本馬榮成嘅《武神》，然後就同個女仔一齊離開。
噚日馮仁昭打畀兆尊，問佢同車厘子係咪拍拖？佢話：「佢係我助手，咪傳囉，我哋成日都自由出入。我又唔係力捧，冇所謂，我哋都係去買game咋嘛。」兆尊話平時自己開工，車厘子都會打吓機，睇嚟佢哋真係幾啱key喎！
