自從失去下屆王牌節目英超聯，有線近排頻頻放風話下半年搞條「十蚊睇一世」頻道同對手now抗衡，你搶波友，我搶街坊友。連新聞頻道亦變陣迎擊，噚日有線新聞部阿頭趙應春話，未來一年額外投放逾千萬元加強節目內容，4月仲會將財經資訊台改為24小時財經資訊頻道。據講幾個高層計劃去外地睇吓人哋有乜嘢可以借鏡。
曾美華冇跳槽
今年係回歸十周年，有線構思咗多個節目，好似長5粒半鐘嘅「偉大構想十年行」政經文化特輯、製作100條5至30秒短片，反映過去10年城中喜怒哀樂嘅「舜間十年」，又喺6月30日下午4點至凌晨2點，重播97年回歸典禮──下下針對對手歷史短，冇片源嘅弱點嚟打。
有線新聞現時編採人員達500多人，阿春話今年會請多幾十人。至於早排傳主播之一曾美華想跳槽，噚日佢都有現身，以行動證明冇走到。阿春話，唔會用高薪同人搶，可能曾美華鍾意有線嘅工作環境都唔定。