近排二手樓市旺番，唔少業主心郁郁想賣樓套現。30歲嘅網友F話自住層樓已經供完，市值100萬元左右，另有10萬蚊現金，喺《香港討論區》問大家，如果賣咗層樓去租樓，將套現嗰筆錢攞去投資有冇着數。唔少網友都好羨慕佢咁後生就供滿層樓，99samson話：「真係話咁快就有第一桶金！」
心思思套現投資
綜合十幾個回覆，大部份網友都唔贊成F賣樓，taimaying話：「恭喜你，咁後生就供完樓。如果你賣咗佢，以後打算一世都租樓嗎？我建議你將每個月原本攞嚟供樓嘅錢，去供股票或基金仲好。」
InitialC7長篇大論咁話：「𠵱家啲人畀唔起首期，先焗住要租樓，你賣咗佢，當你投資好掂，每年回報5%，每年100萬都係賺5萬；走去租屋，當你5000蚊租，一年都6萬啦，即係仲要倒貼，而且你投資唔係實賺㗎喎。仲有租屋真係激死你，遇啱經濟好，約滿之後個業主實要加租，一係就叫你走，煩死你。我係你，就賣咗𠵱家嗰間，然後買間200萬至250萬嘅，以你嘅經濟能力，應該到四、五十歲就供完，到時咪印印腳，又有環境好啲嘅樓住。」
looklook334另有提議：「點解唔翻按呢？反正賣咗租屋又要畀租，不如翻按再供仲好啦。」
聽咗咁多意見，F依然心大心細，因為佢驚呢類細價樓升值能力唔高，遲啲賣會冇咁好價：「其實我比較睇淡樓市，本地人出生率比較低，肯生嘅大部份係新移民，樓市又供過於求；而大陸真正有錢嘅同志亦唔會買啲平價樓，就算政府頂住個市，但到時有價無市，可能只能用嚟養老自住。」