馬照跑，舞照跳，應該要加埋「波照踢」。馬會開設足智彩之後，直令到賽馬投注額下跌，注碼漸漸流向賭波方面。事實上，好似最近一位讀者所講，𠵱家賭波同賭馬，形式上越趨近似；呢位讀者嘅比喻亦做得幾過癮，即管同大家分享下。
「連贏」如「波膽」賠率相若
讀者Ben舉出咗好幾個賭馬及賭波不同項目，作出比較後都幾有趣。首先係賭馬彩池形式嘅「孖T」及「6環彩」，無論派彩及或然率，幾乎同足智彩嘅「孖寶半全膽」及「6寶半全場」差唔多。賭馬受歡迎項目之一嘅「獨贏」，就好似賭波買「首名入球」咁，都係要買中「第1名」至有錢收；有時入球究竟係邊個球員最後掂到個波，就要睇多幾次慢鏡，完場後都未必有結果，就好似賽馬要影相及研訊一樣！
「位置」呢？夾硬話係「讓球」下盤或「讓球主客和」博受讓嗰隊都得，因為唔使贏，打和不敗都有錢收！「連贏」就係「波膽」，賠率相若，又係要估兩個「冧把」。話時話，華度有時玩波膽，都鍾意鎖定其中一隊入球數做膽，例如博某隊贏3:0、3:1、3:2咁。
哈！阿Ben最後仲話賭波都有得玩「位置Q」，華度諗極唔明；原來呢瓣喺足智彩就仲未有，但澳彩及其他外圍就已經有得玩，呢樣就係澳彩嘅「波膽組合」！
文：華度