今朝我求大俠行過馬會，發現成地都係「眼鏡碎」，心諗睇嚟禮拜三深夜好多人都中咗愛爾蘭招，搞到跌晒眼鏡啦！咁又係，睇番前晚15場國際賽，就淨係得聖馬力諾主場對愛爾蘭場歐國盃外圍賽真係會實牙實齒咁打，加上之前愛軍又試過大炒聖馬力諾5:0，所以愛軍單W只得1.001倍，點不知要打到補時先至由艾利蘭嘅入球，險勝2:1，幾乎開出個15倍嘅超冷D！
靠補時入球挫聖馬力諾
踢呢場波之前，聖馬力諾係今屆歐國外嘅3「0」部隊，本來諗住今次佢哋對住實力有番咁上下嘅愛爾蘭，又會俾人哋狂炒啦，所以「讓球主客和」開到愛爾蘭讓4球都叫合情合理。
誰不知呢場波真係搞到捧場客「標晒冷汗」，本來諗住半場摸和0:0都唔緊要，話晒仲有下半場45分鐘比賽，結果基爾賓尼喺換邊後4分鐘，終於為愛軍打破彊局，「客勝」有機啦！點知等了又等，都仲係得嗰1球；咁都唔特止，愛軍仲衰到喺86分鐘俾聖馬力諾追和，終於要等到艾利蘭喺補時後1分鐘嘅入球，愛爾蘭先至以2:1險勝。
睇番𠵱家愛爾蘭，實在有青黃不接之感，好似艾利蘭同埋沙恩朗都係年少氣盛嘅後生仔，喺佢哋發光發熱之前，愛爾蘭都係少掂為妙！
「我求大俠同好多人一樣，本來諗住可以瞓醒收錢，點知驚足成晚！原來『波係圓嘅』呢句至理名言真係咁堅，睇嚟下次都係咪博，費事贏粒糖輸間廠啦！」