廣州廣船（317）係噚日市場焦點，H股一度急升超過3成，內地A股則漲停板。大摩都出報告睇好廣船，並首次定其A、H股目標價為30.20元，睇好理由係相信廣船將受惠於母公司重組及預期於可見將來獲注入資產。
中國現有159家中央企業，80%以上涉及軍工、能源、交通、通信等戰略產業，國資委現在透過整體上市，將央企透過資本市場做大做強，符合國家發展需要，「整體上市」係未來中資股嘅炒作焦點。
中國誠通（217）母公司誠通集團是央企之一，也是3家國有資產經營試點企業之一，去年原本由公安部直屬經營的中國寰島出現財政問題，就是由國資委安排由誠通集團接管。以上3家試點企業，目的是清理國家不良資產以及重組國有資產。
誠通集團擁有特殊地位，兼係國內物流業巨擘，但子公司中國誠通講咗好耐嘅注資遲遲未落實，未知仲差啲乜嘢。上月中國誠通公布10供3，有兩點要留意，第一係非大比例供股之下，供股價低至0.33元，明益現有股東，第二係大股東誠通集團供完後持股會由約30%增至37%以上，供股目的似乎相當明顯，買嚟供有着數。
中國電子遲早注資
中國電子（085）噚日股價有異動，升19%，母公司中國電子信息產業也是央企，另持有內地A股中電廣通（600764），不過母公司似乎特別關照A股子公司，先後注入智能卡公司和中電財務等優質資產。不過香港子公司獲注資也是遲早問題，因為母公司除了係國內電信網絡及IC生產商之外，還是國內最大的數字電視設備供應商，曾參與國家廣播電視幹線網升級等項目，子公司管理層也講明有線電視服務及數碼廣播係未來發展方向，並正與母公司磋商，都有得諗。
歐陽風