無綫姐仔楊思琦在電視劇《突圍行動》中飾演勢利富家女，現實中的她卻偏偏相反，慳家到你唔信。日前她陪母親遊九龍城足足個半鐘，先到麵館醫肚，再到雜貨店狂掃合共200元的浴室鐵通、膠盆及清潔劑等廉價家品，其精打細算，實在令人歎為觀止。
楊思琦是無綫出了名的慳妹，雖然是力捧姐仔，但既要供樓養家又要照顧男友李永豪，家庭負擔甚大，難怪她平日甚少出沒名店，反而平民區九龍城才是她常去的打躉地。
日前楊思琦親率母親到九龍城開餐掃貨，兩母女又食又買，消費300元有找，認真抵到爛。當日下午4時許，楊思琦駕駛其慳油Echo座駕載母抵九龍城，她寧願兜多兩個圈搵每15分鐘收費兩元的錶位，也沒駛進停車場。在街頭泊車後，思琦即與媽咪往清真牛肉館，點了一碗麵和一碟鍋貼兩份食，再加一袋外賣，埋單約63元。
店內大摷特摷
祭五臟廟後，楊媽媽便搭着女兒膊頭逛街，先途經金行windowshopping，再到平民傢俬店睇沙發，但未合心水，她們轉逛舊式雜貨店時馬上表現歡天喜地，在店內大摷特摷，結果買了一條浴室鐵通、一個膠盆、兩包膠地板、四個膠筲箕及幾支清潔劑，合共約200元。思琦更懶理途人目光，捧着鐵通和一袋二袋慢行，取車後即送母抵麗港城才逕自返家。
事隔數天，楊思琦在新城電台接受訪問後，又曾陪母親到黃埔恒生銀行辦理財務事宜，其間她邊行邊跟母親說：「萬八蚊你都買？」不過楊母未有作聲。其後兩母女到茶餐廳午膳，各自點了一客特價午餐，消費約50元。
事後記者致電楊思琦，對於其母花費18,000元，未知是否用作投資用途？她笑說：「呢啲嘢唔好講啦，總之有投資，我都唔理㗎啦，交晒畀媽咪，我唔識理財，佢叻過我好多。」
「嗰間嘢OK㗎」
提到拒做名牌奴隸，往九龍城買平民雜貨極慳家，思琦則說：「就嚟新年，要買吓新嘢、入吓貨，同媽咪一齊買，屋企用嘅嘢，冇乜平民唔平民，都係買清潔用品，清潔用品唔使咁講究，嗰間嘢賣啲嘢都OK㗎，總之應該買嘅嘢就買，唔需要特別花費。」
採訪、攝影：娛樂突發組
