噚日我哋體育版提到，俄羅斯國家隊教練軒廸克涉嫌逃稅，荷蘭檢察官建議判佢入獄10個月，假如罪成當然係大件事。軒廸克準備帶隊鬥荷蘭，加上唔係馨香嘢，所以當前日記者問佢點睇呢單嘢時，都預咗佢會提供行貨答案。點知行係行，但又答得鬼咁有性格：「你唔會踢完上半場就評論整場波。」軒廸克教波醒，談吐一樣掂，呢啲咪叫做名帥風範囉。