孫柏文成日唔明點解個啲真正愛黨愛國嘅左派人士（唔係講緊為油水而忽然愛黨愛國嘅人），可以頂得順班原居民。孫中山、毛澤東等偉人支持嘅共和國主義，邊可能容許「原居民」呢個有特權嘅世襲制（丁屋權）繼續存在。仲有原居民都有分兩級，有新界同九龍香港嘅分別，市區原居民係賤，唔值錢，新界原居民先至值錢。點解有呢個人造分別？係因為一條滿清同大英所簽嘅不公平條約。真正愛共產黨愛共和國嘅人，唔係應該即時推翻呢啲侮辱中國人、侮辱共和國嘅特權世襲制咩？我諗你哋都係會為油水繼續忍算數。
前日聽到一句「人善被人欺」，一位錦綉女住戶無奈同憤怒嘅申訴，就知道錦綉住戶受咗唔少委屈，佢哋都係為咗唔想再有12歲小童死，先至反對錦綉大道畀原居民搞貨櫃場帶來嘅重型貨車通過。𠵱家又唔係冇條新路畀重型車行，點解政府會唔畀行？因為原居民反對，而政府又俾原居民挾持，日前嘅封路衝突係政府成日縱容班原居民做成。
喺呢件事上引出悠來以久嘅問題，就係原居民擅自改變土地用途，將原本係農地同魚塘，改為貨櫃場、停車場及廢車場，掠水賺錢。擅自改變土地用途係件好嚴重嘅問題，地產商改變土地用途，都要畀錢先至得啦，唔係話改就改㗎話，點解政府見原居民咁樣做，竟然隻眼開，隻眼閉，冇出手制止，引致𠵱家嘅局面，係咪原居民800票裏面有好多票？12歲小童要死，係咪因為曾特首要連任？
前日班原居民拆咗錦綉住戶喺私家路上設置嘅路障，咁算唔算侵犯私人財產？點解警方冇出手制止，或者拉人，係咪又怕咗多票嘅原居民？大家都係中國香港特區人，冇分原唔原居民，咁鍾意講強政勵治嘅曾特首，又唔見會做好呢份工？噚日，錦綉居民係全港各大報章賣廣告，都係要求「政府能盡忠職守」，英文可繙譯成Getthefxckingjobdone！
金手指網誌： http://phatdat.blogspot.com