同我哋特首當勞曾同一個英文名、曾經係恒基地產賣樓部重臣嘅張炳強（當勞張）（圖），自05年離開恒地，好快加入咗英皇國際，做地產部總監。唔使一年時間，就已經跳級，英皇噚日宣布，正式委任張炳強做集團嘅執行董事，每年董事袍金10萬蚊。
想當年當勞張喺卓德測計師行過檔恒地賣樓部，由經理開始一直打拼到睇晒成個賣樓部，做埋總經理，後尾仲晉升做恒基發展嘅執行董事，可謂春風得意，喺賣樓界與當時新鴻基地產嘅蘇仲強，講得上係一時瑜亮，笑傲賣樓界。
奈何華資公司嘅人際網絡始終錯綜複雜，加上人生有起落嘅不變定理，上世紀九十年代末開始，當奴張開始有啲失寵，大權旁落，人亦開始轉趨低調。及後自己身體出現毛病要修理，所以04年喺陪同恒基二太子李家誠，推銷西灣河嘉亨灣兼做完幾場show之後，就全身退下火線，04年底仲辭埋職㖭。頭頭尾尾，佢喺恒地都做咗十幾年，為恒地賣咗數以萬計嘅單位，都算係咁啦。
[email protected]