當溫拿慶祝33周年舉辦演唱會之際，五虎的好友陳秋霞也同時推出新唱片。自言不介意新碟銷量、不介意被重提與鍾鎮濤（阿B）的一段陳年舊情的她說：「我只係怕我死咗之後，作嘅歌冇人聽到。」
陳秋霞雖然早已嫁到大馬，身兼三女之母以及市值180億公司的事頭婆，不過離開娛樂圈多年的她近年靜極思動，不但成立公司主辦演唱會，最近更推出新唱片《放飛夢想》，她日前接受訪問時說：「我一有時間就寫歌，之前幾年經歷得太多事喇，又沙士又海嘯，之後哥哥（張國榮）同阿梅（梅艷芳）又走咗，我真係怕萬一我有事，之前作嘅歌都冇人聽到。」
不計成本製作
陳秋霞續說：「我唔係為出風頭，雖然𠵱家市道好差，只不過𠵱家有能力，就想達成自己嘅願望。」《放飛夢想》一碟並非舊歌重唱，而是陳秋霞親自創作歌曲，再邀請成龍、譚詠麟、葉德嫻和羽泉等歌手演繹。問她今次出碟，可擔心銷量嗎？陳秋霞說：「我知市場好窄，大碟之中又冇K歌，其實你可以話我不顧一切後果，我今次連製作都不計成本。如果考慮太多就會卻步，所以我冇考慮太多，就算可能冇市場，我都已經唔理，做完晒先計，玩完咪算囉。」
大馬個唱爆滿
也難怪陳秋霞大口氣，當韓國小天王Rain在港舉行演唱會也要派飛谷入座率時，秋霞的大馬站個唱，在可容納3萬人的場地竟然全場爆滿，平均票價更比香港高一倍以上，難怪她對自己充滿信心。
採訪：藍文浩 攝影：陳俊強
場地提供：RedLily（又一城）
