特首選舉戰啱啱展開，局長們已經表態，對記者講：「如果曾生叫到，我會考慮」諸如此類嘅說話，最令人矚目嘅，當然係他日有希望做特首嘅行政會議召集人梁振英都係咁講。教統局局長李國章唔係一早話要退休嘅呢咩？點解又轉軚話想留任呀？唐司長亦出埋聲㖭。
雖然知道煲呔贏硬，大狀輸梗，想做大官都唔使咁擒擒青嚟公開說心聲吖嘛？啲高官、商人咁樣表態，其實無助於當奴，只會綁住當奴手腳。點解咁講呢？大家都知道今日嘅司局長班子，除咗黃仁龍之外全係前朝遺物，董先生嘅班子之中，包括行政會議成員，董先生話腳痛退任之時，已有不少人唔順眼當奴上位，有情緒，但經中央「強力勸喻」，全部留低唔走，以示局面穩定和諧，先至乖乖地坐番晒響度。
曾先生如果連任，理應有一定自由度，重新洗牌，重組三司十一局及行政會議，搵自己班底就位。外國政府每經選舉後，邊度會有舊人全部留低㗎？賴死咩，安倍晉三一上場，新內閣就送走唔少小泉純一郎嘅擁躉啦，故此畀曾先生一個自由選擇人事權，既係禮貌，亦係佢應得嘅權利。但係咯喎，啲高官、商人個個開口話想留低，你叫曾先生點搞？唔留，會俾人話特區政府分餅仔唔勻，曾特首強勢攬大權。留，又會俾人彈話係舊電池翻新，了無新意，只識行番舊路。
一位老友講：「係唔係曾先生已經考慮組閣，中央放出聲氣，叫啲有關人等表態，隱隱然有逼宮意味，綁住曾先生雙手喎！」呢啲陰謀論，唔敢相信，但係中國官場之人事關係、信任關係，十分複雜，未必就係曾特首能夠完全話晒事，所以佢講「我會做好呢份工」，實有難言之隱，粵語片都有戲俾你睇啦，有黃曼梨做惡家姑，媳婦白燕點會可以輕易咁講句「做好人哋新抱！」
現在就開聲話想留任嘅，未必聰明得晒，開咗聲，第日冇得做，即係相等於被曾生炒魷，中央唔撐，面子會冇晒噃，最聰明嘅局長，就係唔好出聲，免當奴難做。