我都知，蘋果iPodmini已經出咗九世，唔係咩新玩意，將iPod加入車廂音響，亦非今時今日嘅事，但我想話你知，今日介紹唔係普通MINI＋iPod，而係一架經過喪改，可以用原廠機頭玩晒iPod、CD、加埋AMP、大喇叭、改晒馬力嘅「爆音」車，最激係將個尾箱偷空，搖身變成一個超巨大重低音！各界MINI車迷，想好似今日主角Gary咁喺「迷你」空間自製演唱會，咁就要擘大對眼偷師喇！
記者：車圓圓 攝影：林栢鈞
Model：Cannis
喪加
JL名牌音響
「我加咗個iPod插頭，咁就可以駁埋落原廠機頭度。」不願上鏡的改裝高手Gary道。唔係啩？雖然我唔係玩開汽車音響，但係我都知車用iPod插頭唔係今時今日先興囉喎，好多車仲有埋原廠插頭㖭，你唔好呃我唔識嘢喎！正想同Gary咆哮之際，佢好快又補充咗句，「我呢套JL音響駁法唔同，如果用番原裝機頭就咁加個iPod插頭嘅話，只可以聽iPod，但個CD就廢咗，但𠵱家我加咗個CleanSweep，將DigitalSignal轉為Analog，由原廠機頭聲音由1Bit變為24Bit輸出，將清晰度提高，只要㩒個掣，就可以CD、iPod隨時轉換，咁就唔會嘥咗個原廠機頭。其實𠵱家都夠聽，但遲啲我仲會喺中控台上面加多兩個高音喇叭，咁樣啲人聲會仲突出，同埋我打算拆埋後座排櫈，再加多兩部擴音器落去……」嘩，一架MINI玩到咁多嘢，果然唔止MINI咁簡單。
3日Tune車
免麻煩
「我換咗條雙出式死氣喉，所以我自己特登Tune過部車，將馬力加大。」所以話呢，玩車呢家嘢真係可以沒完沒了，整靚咗套音響都仲未夠喉，Gary再將本身已經辣辣哋嘅CooperSTune得更辣，成日聽佢講話Tune車Tune車，語氣講到好似換條胎咁簡單，問佢點樣Tune，原來佢自己換咗部AMD行車電腦，再加埋個「ONECLICK」，佢話真係鍾意幾時Tune都得，可以免卻返廠拆電腦咁麻煩，「因為每架車用油、駕駛者嘅駕駛習慣都唔同，而行車電腦就係負責記錄低呢啲Data，所以每次Tune車，都一定要將架車駛返車廠，再拆部電腦出嚟Tune，好麻煩，我𠵱家換咗英國呢個AMD電腦，佢有個配件叫「ONECLICK」，每次想Tune車，只要將行車電腦裏面所有行車資料同原廠DataDownload落「ONECLICK」度，後再寄返英國，如果無問題的話，2-3日已經可以搞得掂，唔使拆嚟拆去咁麻煩。
另一個好處，就係佢可以同時整4個唔同嘅SettingMap，例如第一個係換死氣喉、第二個係引擎，咁樣方便好多。除此之外，佢唔同其他電腦，用佢Tune車最大好處係起步比原廠Setting爽好多，之前Supercharge會有Lack，又會跌轉，𠵱家成架車暢順好多，佢唔止係幫你加大馬力同扭力咁簡單，仲可以彌補到原廠Setting嘅不足。」
Soundsfrom
查詢：EncrustCustoms（28382666）