香港唔少酒樓食肆都會喺餐牌註明，會收加一服務費，大家都習以為常，有時仲會額外畀多啲「貼士」；美國餐飲業就唔同，佢哋啲侍應基本薪金極低，客人畀嘅小費先係主要收入來源，但係餐牌就冇寫明要畀幾多。
加二唔算多
網友queen4hart喺《MSN》討論區度問：「出街食餐飯嘅服務費佔消費額20%，會唔會太高呢？好似買樓要畀樓價嘅6%做經紀佣金一樣，我覺得唔值囉！」sgtm7回應：「啲侍應有人工𢭃，我唔覺得有義務要額外再畀小費，但係我通常都會畀單價嘅15%做貼士，但又唔會少過2美金。」
Leesuhdotcom對呢種規矩都好反感，「侍應人工低，就要畀多啲貼士幫補吓佢哋，呢個諗法根本就唔合理。畀貼士純粹係因為佢哋做得好，同人工高低冇關。」
不過，Pappy97就話：「出得去食飯，就無謂計較嗰少少貼士錢，最緊要開心。如果人哋服務殷勤，我最多會畀單價嘅40%作打賞，都算係一種鼓勵同讚賞佢哋嘅方式。如果佢又靚女兼笑容可掬，我仲會再畀多啲㖭﹗」嘩！咁都得？
喺美國出外進餐，畀小費係不成文習慣，消費者當然有權唔畀，而一般小費嘅百分比，午餐約為賬單金額10至15%、晚餐約15至20%。但部份餐飲商可能會按一定比率計算小費，仲會計埋入賬單總額，所以最好睇清楚張單。
此外，原來小費（tip）、服務費（servicecharge）同埋賞錢（gratuity）嘅字面意思好似差唔多，但據紐約州稅務財政廳（NYSDepartmentofTaxationandFinance）嘅資料顯示，顧客隨個人心意畀嘅小費唔使加銷售稅，但餐廳按一定比率計算嘅賞錢同服務費，就可以喺賬單上加銷售稅。