康華喜歡捐窿捐罅搜尋美食，農曆新年期間，她會忙於招呼一班外國來港的朋友。而過年時，她又會按傳統吃餃子，吃中包了錢幣的餃子固然象徵行好運，不過將來男友求婚就不必在餃子中放巨鑽，若因而咬崩牙，只會反面收場。
康華近日正在趕拍無綫新劇《舞動全城》，一切進行得如火如荼，不過她現在十分期待農曆新年可以停廠三天的日子，因為該段時間會有一班朋友從美國來港，她會一盡地主之誼負責接待。近日她已四出品嚐美食，搜集資料，以便稍後可以向朋友推介香港這個美食天堂，以免失禮香港人。
食中硬幣行好運
問到康華最愛甚麼食物，她說：「我最鍾意食鮑魚，可惜自己唔識整。」康華的母親是上海人，煮得一手好菜，她說：「記得農曆新年要食餃子，傳統習俗會喺其中一隻餃子裏面放個硬幣，邊個食到嗰年會行好運。」若將來男友用這招求婚，在餃子中放上巨鑽，問她可會感動，康華抵死地說：「咪搞，萬一咬崩我隻牙，我真係會同佢反面，仲點會嫁佢。」
對求婚儀式有要求，康華自言挑選食肆也十分奄尖，她說：「我要求環境舒適，食物當然要好食，服務態度都好緊要。」
招呼朋友壓力大
康華打算帶外國朋友往吃特色點心，她說：「坦白講，帶朋友四周圍玩好似好開心，實質有無形壓力，我好擔心萬一招呼不周，我鍾意嘅嘢又唔知啱唔啱佢哋心水，我會為咗咁失眠，壓力仲大過拍劇！」
採訪、攝影：比華利
化妝：MeeganSeakofMaeVon
場地提供：富聲魚翅海鮮酒家
